Ia kynad ha sor Tura, ba shah shoh u samla Garo, ha ban da iap

Shillong, 16 Risaw:
Uwei u samla, ula iap ei mynta ka sngi, ha ka jingshah shoh ha ki riew runar, ha ka dong Rishipara, ka dong kaba don ha Tura bad katei ka jingjia, ka la pynmih ia ka jing ia kynad kaba jur ha katei ka nongbah mynta ka sngi. La iathuh ba ka jingiashoh, ka dei hadien ba utei u samla, ula shah shoh lem bad ki arngut kiwei pat ki paralok jongu.
U Deputy Commissioner jong ka West Garo Hills, U Pravin Bakshi, u khot ia ki paidbah, ba kin long jai jai.
Ki pulit, ki la ioh ban kem ia ki lai ngut ki briew, kiba donkti ha katei ka jingjia bad kitei ki long U Dulal Rishi (41), U Nipen Rishi (38) bad U Hemandra Rishi (35), kiba dei baroh lai ngut na katei hi ka dong.
Ka kmie jong utei u samla, uba iap, ka iathuh ba kitei ki lai ngut ki runar, ki la leit sha katei ka dong ha ka miet sngi Palei, ha ka por 9baje eiei ban thied jingthied, hynrei ki la don ki briew kiba tap khmat, kiba la shoh ia ki bad kitei kiba shoh, ki dei kiba la tap ia ki dur khmat jongki.
Uwei na kitei ki lai ngut, uba shah shoh bad uba la khlad noh mynta ka sngi, ha ka por 12baje nohsngi, u dei U Sengat N Sangma (16), uba shah sumar ha Tura Civil Hospital, uba la duh noh ia ka jing iohi jong ka khmat jongu bad U Sengat, u dei uba shon ba sah ha Reserve Gittim jong ka nongbah Tura.