Shillong: Ka High Level Committee (HLC) hapoh ka jingpyniaid jong u symbud myntri rangbah u Bah Prestone Tynsong mynta ka sngi ki la shong ban ia mir jing mut halor ka phang ban weng noh ia ka surok ka ba iaid lyngba ka madan Golflink shuwa ka National games 2022. Ia kane la ia thuh da u bah Alexander L Hek u myntri ba dei peit ia ka koit ka khiah jong ka sorkar jylla u ba dei ruh u MLA ka thain Golflink.
Haba kren ha ki lad pathai khubor mynta ka sngi ha dien ka jingiakynduh jong ka HLC,u bah AL Hek u la ong “Ka tnad PWD ka la pynkhreh ban wad jaka ban shna surok na shawei la da pynduh noh ia ki ar tylli ki surok kiba iaid na pdeng ka Golf Course.
U bah Hek u la iathuh ruh ba ka tnad PWD, ka thmu ban pynduh noh ia ki ar tylli ki surok ba don mynta bad ha ki jaka ki ne ki surok kin shna noh da kawei na Police Training School ban poi sha khmat jong ka Hawkers market bad na Public Training School sha Forest Colony, ia kine ki surok yn tip kum ki surok by- pass.
U la ong ruh ba na ka bynta ki paidbah ban ia lehkai ka dang don ka jaka kum ba 8 akar ei ei bad ia ka ne ka jaka yn shna na ka bynta ki jingialehkai ki khynnah bad ka jaka bam khana, ia kine la thmu ban shna namar ba ka jingialehkai Golf ka dei kawei na ki jingialehkai ha ka National Games.
Na ka liang ka HLC mynta ka sngi la bthah ia ka tnad PWD ba kan pynkhreh ia ka “Detail Project Report” bad ia ka ne kin sdang pynshna noh ha dien ba la ioh ia ka jingpynkhreh na ka PWD yn sa lah ban tip katno ka jinglut na ka bynta ban leh ia kane ka kam.
Phi don ban ong eiei?