Shillong:U Chairman ka Maitshaphrang Tourism Promotion Club u bah Michael N Syiem, u la pynbna ba un pynlong da ka jingiakhih ha ka 3 Tarik Lber hajan ka Secretariat ban pyrshah ia ka jingkynnoh leh shiliang ka Sorkar ia ki nongseng kam ha ka kam jngohkai pyrthei.
Haba kren sha ki lad pathai khubor, ha ka 26 Tarik Rymphang 2025, u bah Michael N Syiem u la ia thuh ba ia ka Lumpongdeng Island, la shimti da ka Maitshaphrang Tourism Promotion Club naduh u snem 1997, na ka Meghalaya Energy Corporation Limited, Corporate Affairs, na ka bynta ban kyntiew ia ka kam jngohkai pyrthei ha ka Jylla, kane ka kynhun mynta la 27 snem ka la sumar sukher ka la pynitynnad bha ia kane ka jaka, hynrei na ka liang ka Sorkar ka la phah da ka shithi ban pynsangeh noh ia ka jingaiwai sha ka MTPC.
“Dang shen ngi iohi, ba ka Sorkar ka la dep ban pynbna ba kan aiwai ia ki jaka sha ki briew ba wan sengkam ban kyntiew ia ka kam jngohkai pyrthei ha ka Jylla da 30 snem. Kane ka khubor ka la pynkmen ia ngi, hynrei na ka liang ka MeECL ha ka 11 Tarik Naiweng 2025 ka la pyntip ban pynkut noh ia ka jingaiwai sha ka MTPC ha u 31 Tarik Nohprah 2024 bad la ai por shibnai ban pynpra noh ia kaei kaba ngi la tei pynitynnad ia kane ka jaka” u la ong.
“Halor kane ngi la leit ban iakynduh sha ki Myntri ka Sorkar bad kumjuh ngi la kynduh ruh ia u myntri rangbah ka jylla u Conrad K Sangma, ban kyrpad ba un iarap hynrei ngi la ioh da sa kawei ka shithi ba la pynjlan sha ka 15 Tarik Rymphang 2025 bad ngi dei ban pynpra noh ia kane ka jaka ha u bnai Lber ” u la bynrap.
U bah Syiem u la kdew hangne “Ha shwa ba ka MTPC kan shimti ia kane ka dewlyngnong, ym don ba iohi ba sumar ia kane ka jaka bad hadien ka jingshimti, ngi la pynitynnad ia kane ka jaka kaba la lah bha ban khring ia ki nongwanjngohkai pyrthei sha kane ka jaka hynrei mynta ki la mut ban knieh jyndat kumto”.
“Ngi ioh jingtip ba ka sorkar ka thmu ban wanrah da kawei ka project baheh hakane ka jaka , hynrei lada kdew kiba bun ki jaka kiba ka sorkar ka ai wai sha ki bar Jylla, kum ka Blue Tower ka Jiva ha Sohra, balei ia ki kim leh eiei, hynrei ia ngi pat ki knieh ia ka kam” u la ong.
“Ka jingleh ka Sorkar kam dei ka sien ba nyngkong, namar wat ia ka Crinolin Swimming pool ruh, nyngkong ka dei tang ka jaka ia dih kyiad ia khalai, hynrei ka Sorkar hi ka la tyrwa ia ngi bad haba ngi la pynitynnad bad pynlong ia ka ka jaka ba paw ki la knieh noh na ngi khliem siew bai lutksan bad kane ka juh hi ka long biang kumjuh, kumta nga la rai ban mih iakhih hajan Secretariat naduh mynstep haduh janmied man ka sngi” u la ong.
Phi don ban ong eiei?