Ia ki kam beain dei ban pynduh mar ia sdang mih shylluit, ong u myntri

Shillong: U Myntri tnad kam pohiing u bah Lahkmen Rymbui u la ong ba ki kam beain kim dei ban ioh lad ha ka jylla bad ki bor pulit, ki bor synshar district ki dei ban peit ia kane ban tem naduh ba ki sdang shylluid.

Haba jubah halor ka jingkynnoh shalan dewiong beain ha ka jylla, u bah Lahkmen u la ong ba um kwah ban kren kyrpang ia kano kano ka kam hynrei u sngew ban kren kyllum ba kino kino ki kam beain, kim dei ban ioh haka ban pynthut ia ka shongsuk shongsain.

“Ka kamram jong ka bor synshar district, ki pulit ban pynthikna ba kino kino ki kam beaiñ kim dei ban ailad ban ioh rung bad dei ban pyrshang ban pynduh”, u la ong haba iakren mynta ka sngi.
U la bynrap biang ruh, “Ngam peit ia kaba shadien, ngan peit ia kaba shakhmat. Ngam lah ban kren kyrpang ia kata ka jingshalan dewiong beaiñ hynrei nga kren kyllum ba ki bor ka ain ki dei ban pynduh ia kano kano ka kam beaiñ mar ia sdang shwa ba kan heh”.
U la kyntu ia ki paidbah ban iatreilang bad ban tei ka jingiajan bad ki pulit ban tehlakam ia ki kam sniew ha ka jylla. “Kano kano kaba ngi leh ka dei katkum ka ain. Nga kyrpad ia ki paidbah ban ai jingtip bad iatreilang bad ka bor ka ain lada don ki kam beaiñ.
U la ong ba ka kam jong ka tnad pulit ka long ban peit ban don ka shong suk shong saiñ hapoh ka jylla bad kaba kongsan ka long ban don ka jingiajan hapdeng ki pulit bad ki paidbah ha kano kano ka kam ban ioh ia ka shong suk shong saiñ. U la ong ba lada don kano kano ka kam beain, ki paidbah ki dei ban pyntip sha ka bor ka ain ban leh ia kaba donkam.
Halor ka jingjia ha ka jingshah hiar thma ki briew ha khappud ha ki runar na ri Bangladesh, u myntri u la ong ba kaba kongsan ka long ka tnad pulit ka dei ban don ka jingiadei hapdeng ka pulit bad ka BSF ban pahara ha ka khappud na kawei ka jaka sha kawei ka jaka khnang ba ki paidbah kin tip ba kin sngew shngaiñ. “Ki thaiñ khappud ki dei ban shong suk shong saiñ bad ha kane ka taïew ban wan ngin pyrshang ban bishar ia ki jinglong jingman ha ka jylla, kaei kaba ngi dei ban leh bad kaei kaba ngi lah ban leh”, u la ong.