“Ia kaba u Blei u la pynkhuid, me wat niew sang”

Ex. Rev. Langrin

(kam ki Apostol 11:9)
Paralok nongpule Baibl, nga ngeit ba phi la ioh ban pule ia kitei ki kyntien ba la thoh ha ki kam ki Apostol lynnong 11 dkhot 9. Lada phi la kum klet ne lada phim pat ju pule, shah ia nga ba ngan pynkynmaw ba u Blei u la kren ha u Petros, “Ia kaba u Blei u la pynkhuid, me wat niew sang ma me”.

U Petros u dei u Jiw. Ki Jiw kim ju bam ia ka doh jong ki mrad saw kjat kum ki masi, ki sniang, ki blang, ki langbrot bad kiwei kiwei. U Petros ruh kum u Jiw, u khein sang katta katta ia kitei ki jait doh lait tang ia ka doh syiar, ka doh han, doh sim kiba don tang ar kjat. Haba u Petros ha ka jingleit ialap jong u, u la poi sha Joppa u la thngan ym don pyrthei shuh.

Kumta u la leit rung ha ka iing jong u Simon nongshna snieh uba long u Jentil. Ki Jentil ki dei ki jait briew kiba ju bam bad ki bym khein sang ia ka doh jong ki mrad saw kjat. Te ki Jiw ki isih katta katta ia ki Jentil, kawei na ki daw ka long namar ba ki bam ia ka doh jong ki mrad ba pohjait.
U Petros ha kata ka sngi ha shuwa ban rung ha iing jong u Simon nongshna snieh, u la iohi lypa ia ki snieh masi, snieh blang….. ba u Simon u la thad ha barada ban suh juti, suh pla bad kiwei kiwei. Kumta u Petros u la ijli lypa, tangba ka kpoh jong u ka la jan dam syndah namar ka jingthngan, te um banse ban rung. U Simon nongshna snieh u long u briew uba bha, uba kloi ban khot basa ia ki nongwei bad uba kloi ban ai bam. Te u la pdiang sngewbha ia u Petros ban rung ha iing jong u. U la ai jaka shong bad u la sdang ban shet ja, shet doh masi, doh sniang, doh blang ia u. U Petros haba u iohi ba u Simon u la khreh bam ia u da kita ki jait doh mrad ba u khein sang, u la isih. Hynrei um kren wat shi kyntien ruh. Ha kaba khatduh u Petros u la rai ban leit duwai jar jar ha u Blei kumno u Blei un jubab ia ka jingduwai jong u. La ka long ne em ia u ban bam ia kita ki jait doh.
Kumta, u Simon u dang shet jingbam, u Petros pat u la leit marwei hajrong jong ka iing ban duwai. Ha kata ka jingduwai jong u u la iohi ia ka jingithuhpaw ba u khiew na bneng u la hiar ryngkat bad ka jainsiang, ka da hap halor kata ka madan jong ka mala kaba ar ba u shong bad dem ban duwai. Ha kata ka jainsiang u la iohi ia baroh ki mrad sawkjat ba ki iaid bad mareh. Te ka ktien sawa na bneng ka la ong ia u Petros, “Ia kaba u Blei u la pynkhuid, me wat niew sang ma me”. Kata ka ktien ba la kren ha u Petros ka la long haduh lai sien. Ynda u Petros u la kyndit bynriew u la hiar sha ka kamra ba shapoh, u la iohi ba u Simon u la dep khreh nadong shadong ia ka ka ka jyntah. Te u Petros u la bam. Ka dei ka sien banyngkong ia u Pteros ban bam ia ka doh ki mrad sawkjat. U dei u Jiw banyngkong uba bam ia ka dohsniang, doh masi, dohblang …
Halor kane ka khubor ba lyngkot, ngan pashat jingmut ia phi kiba ki ju niew sang ban ia iaid lang bad ki nongpop. Ki Khristan kiba sngewhok, sngew khuid, sngewbiang kim kwah ban ia kren, ban ia dihsha, ia bamja lang bad ki nongpop, namar ki ong, ioh bit pop. Nga imat kiba kum kita ki Khristan ki dei kiba bym ju pule ne kim pdiang ia kane ka jinghikai u Blei ia u Petros. U Blei u dang kren ha ki Khristan ha kine ki sngi ba ia kiba la kylla bamut bad ba la sait da ka snam u Jisu, ngim dei shuh ban niew sang, namar ki la long khuid.