“Ia ka Pynursla, la kyntiew sha ka Civil Sub Division”

Shillong, 12 Jylliew:
“Ia ka Pynursla, la kyntiew sha ka Civil Sub Division” ong U Mukul Sangma, myntri rangbah ka Jylla, haba kren ha ka jingialang shwa ban sdang ka phutbol phainal ha Madan ialehkai phutbol ha Urksew , ha ka sngi saitjain ba ladep.
U myntri rangbah, ula kren ia kitei ki kyntien, ha ka jingiadon lang jong u MLA ka thain u Bah Prestone Tynsong u ba dei u Myntri ha ka sorkar ba ialam khmat da u Dr Mukul bad kiwei pat ki MLA kiba la wan ban ia donlang ha katei ka sngi. Katei ka jingkren, ka la pynmih ia ka jing ia risa da ka jingkmen; hynrei u Myntri Rangbah u khlem iathuh pat lano yn plie ia katei ka Sub Division ba thymmai.
Ha katei ka sngi, u Myntri Rangbah, u pyntip ruh, ba yn sa pyntrei noh ia ka surok naduh Shillong sha Dawki haduh Bangladesh kan dei kawei na ki surok ba pawkhmat ha ka pyrthei.
Katkum ki tyllong khubor la iathuh ba ka kompeni na ri Japan, ka Japan International Corporation Agency (JAICA) kan shna ia ka surok bah national highway-40 da ka Two Lane na Umhyrpi shaduh Dawki lyngba ka ram ka ban sa siew da ka sorkar pdeng.Kane ka kompeni ka la pynkhreh mynta shaid shaid ban survey ban shna ia kane ka surok bah bad kaba sah ka long ba kan pynbiang ia ka DPR ban phah sha ka tnad Ministry of Road Transport (MORT) ba kan pyndep ia kaba donkam.