“I kumba ki ophisar ba la shongthait ki don jingïadei bad ka VPP”

Shillong:U Symbud Myntri Rangbah ka Jylla Bah Prestone Tynsong hynne ka sngi Thohdieng ula ong ba i kumba ki Ophisar ba la shongthait, kiba lah shah wengkam na Lokayukta ki dei kiba don jingïadei bad ki Nong ïalam ka Liang Pyrshah Voice of the People Party (VPP).

Haba kynthoh ïa ka jingïakhih ki MLA ka VPP ban dawa thungkam biang ïa ki Ophisar ba la shah weng kam, u Bah Prestone la ong, “Nga ïohi ba ka jingdawa ba nyng kong eh jong ka VPP ka long ban thungkam biang ïa ki Ophisar ba la shong thait hynrei nga kwah ban kylli ba halor kaei ka nongrim ba ka Sorkar kan thungkam biang ïa ki, ïa mynta hi ngi la don ïa ki Ophisar ba dang don ha ka jingshakri ba kin long dkhot ha Lokayukta”.

“Ngam tip balei ba ki MLA ka VPP hap ban mih sha surok bad kren ïa kine kiei kiei. Ngi la ïohi ïa ka shithi ba ki phah, Ngi la dep pule baroh bad ngi la dep ruh ban pynshai ba kine ki dei ki rule,” ula ong bad bynrap, “Ngam ïohi ïa ka jingbakla hangno hangno ruh bad ka rai ba la shim da ka Sorkar ban wanrah ïa ki Ophisar kiba dang don ha ka jingshakri ha kine ki lai tylli ki kam”.
Haba pynpaw ba ka don ka jingiapher bak ly bak hapdeng ki Ophisar ba dang don ha ka jingshakri bad kiba la shongthait, u Bah Prestone ula ong, “haba ngi thung ïa ki Ophisar ba dang don ha ka kam, ngi la kunai ïa ka pisa. Ha ka jaka ban ai tulop ïa ki, ngi lah ai sha ki tang ka TA/DA ba ki shong bishar kam. Dei namar kata ba hadien ka jingbishar bha, ngi la thung ïa ki”.

Halor ka jingkylli, u Symbud Myntri Rangbah haba thalaiñ tyngeh ïa ka VPP baka pyrshang ban pynïasoh ïa ka rai jong ka Sorkar bad ka kam bamsap ba donkti lang u MLA, uba la shah chargesheet ha ka Lokayukta, ula ong, “La I kumba kito ki Ophisar ba shah wengkam ki don jingïadei bad kito ki briew na ka VPP”.
Haba pynpaw ruh ba kam don nongrim satia ïa ka Sorkar ban khot ïa ka VPP sha ka jingïakren, u Bah Prestone ula ong, “Ngin ym khot satia ïa ki sha ka jingïakren. Lada ki kwah ban ïakren ngi long kiba kloi hynrei balei bangin khot ïa ki haba ngi lah dep ban pynshai ïa baroh”.
Nalor kane, u Symbud Myntri Rangbah ula ïai ban ba ka Sorkar ka hap ban ïaid katkum ka Act bad ka Rule jong ka Lokayukta, kaba kren shai ba dei ki Ophisar ba dang don ha ka jingshakri, kiba hap thung hapoh ka Lokayukta.