I khyllung, I khlem iam, ha ka por ba kha, pynshai ka myntri

Shillong:Ka Myntri ba khmih ia ka tnat ka koit ka khiah, ka Dr Mazel Ampareen Lyngdoh ka la ong ba I khunlung ba khlad na ka kmie ka kong Paltima Rani ba sahkut u thyrnia, iba don ka jingjyrwit ha ka por ba kha ha kaba I khunlung I khlem iam ha ka por ba kha.

Haba kren mynta ka sngi, ka Kong Ampareen ka la ong, “Katkum ka jingiathuh ki doctor, ka kmie I khunlung ka la ioh bor, sngewsih ngi duh ia I khunlung, iba don ka jingeh ban kha ha kaba im iam ha ka por ba kha, i don jingeh ha ka jingring mynsiem”.
“Nga pynpaw ia ka jingduh kaba khraw sha ka kmie kpa, nga khmih lynti ba ka jingjia kum kane kan ym jia shuh nangne shakhmat, ngin pynbha ia ki tiar ki tar. Nga la bthah ban tohkit halor kane ka jingjia”, la bynrap ka myntri.

Ka la ong ba ka sorkar ka sngew ba kaba nyngkong eh kaba dei ban leh ka long ban ai ia ki kmie ia ki khun ban sakha ban long kiba koit ba khiah.
“Kaei kaba jia ha Ganesh Das ha kane, kam dei ka jingjia kaba ka rukom leh kaba leh tang ia ine I kmie, hynrei ka dei ka rukom pynkha kaba ju leh barabor. Hynrei kumba ju long, kawei na ka shispah sien, ka jia kum kine ki jia bad shisien ba ka Ganesh Das ka iohi ba kam don kata ka lad ban pynmih wut wut na kata ka jingma, ki phah noh sha kawei ka jaka kaba kham biang bad la phah sha NEIGRIHMS ha kaba don ka mashin ban iarap wut wut ia ka longkmie. Hynrei kaba nyngkong eh ka long ba ka pynsangeh ia ka jingduh snam jong I kmie, ba ka kmie kan lait im, te ki la leh ia kata. Nga sngewsih shisha ba la duh ia ka jingim I khunlung, hynrei ngin iaid shakhmat ban don ka jingshaniah ha ka hospital lajong. Na ka por sha por, ngi iohi ba lada jia ino ino I jingjia iba tang khyndiat ruh, ka ju dei hi ka jingmlien ban pynrem ia ki tiar ki tar lajong”, ka la ong.

Lah ban kdew ba ka kong Paltima Rani na na ka shnong Mawlyndep ka la hap ban phah sei ia u thyrnia ba sahkut ha ka met ha ka por ba ka leit kha ia I khun ha Ganesh Das Hospital sha NEIGRIHMS, katba I khunlung ila khlad noh hadien ba la pynrah sha Nazareth Hospital ha kane ka sngi Balang.
Ka shnong Mawlyndep ka la dawa ban buria ia ka jingduh sha katei ka longïing bad ban pynshitom ia kito kiba don bynta ban sumar ia katei ka longkmie haduh ban sahkut u thyrnia ha ka met bad ban khlad noh I khunlung.