I bynta badang sah

AIS SUJA

Ka mut ia kaei haba u Blei u ong – I bynta ba dang sah? Jeremaiah 23:3, I bynta ba dang sah na ki khun Israel kein. Kane ka long ka jingiathuhlypa u Nongiathuhlypa Jeremaiah hakaba u la thoh ia kine kiei kiei ha ka spahsnem, ba hynriew (6th century B.C) ha shwa u khrist. Ki nongap jong ki Israel ki la pynjot thiaw ia ki khun Israel pateng la pateng tang ha ki niam ki rukom jong ki khlem da kohnguh ia u Blei bad Ia ka ktien jong u, wat ha ka hukum barim (old testament) ruh kim lah eiei ban kohnguh ia u Blei, kat haduh ba u Blei u la bitar eh halor ki Israel. Kadaw baroh ka long na kita ki nonghikai pynbakla ki Pharisi bad ki Saddusi kein. Mathaios 16:12. Katba kum ki jingleh jong ki phi wat leh, Mathaios 23:3. Kine ki dei kita ki jinglong jong kita ki nongap ia ki khun Israel ia kaba u Jeremaiah u la ong. Ki Israel kum ka jaid bynriew ka la jot noh tang na kadaw ki nongap ne ki nongshynshar jong ki kiba leh riew blei ialade khlem poi shano shano ruh.

Dei halor kane ka juh ba la ong ha u Hosia – “Ia u paidlang jong nga la pynjot namar bymdon jingtip (jingtip ia ka ktien u Blei). Kat haduh ba u Blei u la ong- “Namar me la kyntait ia ka jingtip (ia ka ktien u Blei) Nga ruh Ngan kyntait ia me (Israel) ba men ym ioh long lyngdoh satia ha Nga, naba me la klet ia ka hukum u Blei jongme, Nga ruh ngan klet ia ki khun jong me (ia ki pateng) Hosia 4:6.

Na ki daw ki nongsynshar na kidaw ki nongialam niam jong ki Jiw, la pynsakma kylleng ia ki ba bun, ka jingbitar U Blei ka la long halor kita ki nongap langbrot ki nongsynshar kein ha Ri Israel tad haduh ba la pynjot thiaw ia ki Israel bad ia ka Jerusalem. Kane ka jingjot thiaw ka la jia hadien u 70 A.D. Ha shwa ia kane, u Blei u la pynmih ia u ta u tnat u bahok na ka pateng u David ha Ri Israel. Jeremaiah 23:5. U Blei u la pynmih ia u ta u tnat (u Jisu) ha Ri Israel naka ing u David. Une u tnat u la hikai ia ka hok baroh hynrei ymdon ba suidniew ki kyntait pynban ia u. Ioanis 1:11.

Ia ki Israel la I bein bad leh bein da kiba bun ki Ri ka pyrthei khamtam eh ha ki Ri pdeng pyrthei ne (Middle East) ki Ri Arab baroh. La ialam mraw sha kylleng ki Ri, la pynjot ia ka Jerusalem bad ia ka Temple, la synshar halor jongki da kiba bun ki syiem ki hima pyrthei. La ker kut ia ki Israel da ki kharai ba la tih sawdong ka Jerusalem bad ki la shu iap thngan hangta kat haduh ba ki la ia bamdoh ia ki khun jong ki. Deuteronomi 28:54-57. La pyniap ruh ia ki da ka waitlam bad da ka jingthngan haduh 11 lakh ngut, 1 lakh tam la ialam mraw sha Rome bad sha kylleng pyrthei. Kine ki la jia naduh ka snem 1939 AD haduh u 1945 AD kaba mut haduh ka thma bah pyrthei ba ar. Hadien kane pat, u Adolf Hitler ka Nazi Germany u lapyniap shibun ki Israel, umkwah ban pynsah symbai wat ia iwei ruh I jait Israel ha sla pyrthei. U Hitler u la pyniap haduh 60 lakh ngut ki Israel ha kato ka por. Shisien pyrkhat ymlah mutdur shuh ba ki Israel kindang sah symbai ha kat kane ka jingshah lehbein bad shah pyniap bein da ki nongshun. Hynrei u Blei u ri kyndong namar ka ktien jong u ka la kren ia kata “I bynta ba dang sah”. Jeremaiah 23:3.

Kumta, tang hadien 3 snem. Ha ka 14 Tarik u May 1948 AD, u Blei u la ai pat ia ka Ri Israel ha ka kti ki Israel (Jiw). Kumta ka jingiathuhlypa u Jeremaiah shaphang ki Israel da kaba ong – “kat ba im u Trai u ba la wallam noh bad la ialam ia u symbai (ba dang sah) ki ing Israel na ki Ri shatei (farther North), bad naki ri baroh sha ki ba nga la beh ia ki: bad kin ioh shong ha la ka jong ka Ri. Jeremaiah 23:8. Ainguh ia u Trai ba u Blei um ju lamler kaba u kren ka long thik kumta. Jingkhein 23:19.

Mynta ngi iohi ba hadien ki 1878 snem (70 AD-1948 AD) u Blei u la wallam pat ia ki Israel sha la ka Ri jongki. Ha u 1948 la pynbna ba ki Israel lyngba ka UNO ka la pynbna baka la ioh ia la ka jong ka Ri. Mynta, ita I bynta basah na kitei ki phew lakh ngut kiba la shah pyniap, ki la roi la par kila don ha la ka Ri 72 snem kynthih. u Blei u long uba bha umjuh lamler. U kynmaw ia ki Israel hapdeng ki 1878 snem ka jinglongmraw jong ki. Mynta ki lalong ki kynrad ha la ka Ri namar ka ktien u Blei. Ka kren – BAD KIN IOH SHONG HA LA KA JONG KA RI Jeremaiah 23:8. U Blei u ong – NGA LA KREN TE NGAN PYNDEP IA KA, NGA LA THMU TE NGAN LEH RUH IUA KATA. Isaiah 46:11.

Ine I bynta ba dang sah ba la pynsah da u Blei ki la roi mynta 72 snem. Hapoh kine ki 72 snem ka Israel ka long kawei na ki Ri khrawbor (super power) wat la ka long ka Ri barit, ym na ka jingstad jinglah jong ka hi, hynrei namar ba u Blei u LAKREN.

Ine I bynta badang sah kein I long uta u Diengdumbur ia uba u Jisu u la ong- Haba ka tnat jong u ka la khie lung bad sei sla, phi tip KA LYIUR KA LA JAN. Mathaios 24:32. Kata kapor ki jingjynjar bah kein ha ka pyrthei. Ka Israel kadei ka it khmih ia ka pyrthei, Ban iohi iakata, ngi dei ban tip naka ktien u Blei, baka jingpynwan pat ia I bynta ba dang sah, la pyndep. Jeremaiah 23:1-3. Kumta ka ladei ka por ba kata ka lyiur ne ka jingjynjar bah kan wan ha ka pyrthei, bad mynta ka la sdang.

Suk uta u ba pule, kita kiba iohsngew ia ki ktien jong kane ka jingiathuhlypa, kiba sumar ia kiei kiei ba lathoh ha ka – KATA KA IA KA LA JAN. Jingpynpaw 1:3. Amen.