HYPOTHYROIDISM

Kong Linda Kongwang

HYPOTHYROIDISM:- Ki jingbam kiba phi dei ban bam bad kiar naka bynta ka koit ka khiah jong u thyroid.

Ka hypothyroidism kadei ka jait jingshitom kaba wanjia haba u thyroid um lah ban treikam bha. Ka jingbymtreikam bha u thyroid kadei na kadaw ha kaba u thyroid glands um lah ban pynmih bha iaki thyroid hormones katkum ka jingdonkam.

Ka jingbymbiang haka jingdon ki hormones na kadaw kane ka jingshitom kalah ban wanrah shibun ki jingktah haka liang ka koit ka khiah. Bunsien kane ka jait jingshitom kam ju pynpaw kloi iaki dak jingshitom, hynrei katba ki por ki nangiaid kane ka jingshitom kalah ban paw dak jingshitom kum ka jinghap shniuh,ka jinglong thait ka met, ka jingjur ka cholesterol, ka jingkiew jingkhia,ka jingtlot ki dohksah, ka jingkhuslai jingmut nalor shibun kiwei pat ki dak jingshitom. Ka jingbymlah ban shimkhia bad sumar kloi ia kane ka jingshitom kalah ban buh jingma halor ka jingngat haka jingpang klongsnam, ym punkhun, la jingshahktah ka bor jabieng bad ka myxedema.

Ki jingbam ki shim iaka bynta ba kongsan ban tehlakam iakane ka jingshitom. Kine harum kidei ki katto katne ki jingbam kiba phi dei ban kiar bad kiba phi donkam ban bam lada don ia kane ka jingshitom (Hypothyroidism).

KI JINGBAM KIBA PHI DEI BAN KIAR NAKA BYNTA KA KOIT KA KHIAH JONG U THYROID.

1. KIAR NAKI JINGBAM BA JUR KA IODINE:— Ki don katto katne ki jait jingshitom (hypothyroidism) kiba wanjia naka daw ka jingbymbiang haka jingdon ka iodine. Kidon bun ki briew kiba kynthup shibun ka iodine haki jingbam ba ki ju bam. Ban bam iaki jingbam ba jur ka iodine kalah ban don ka jingktah iaki hormones. Kumta kaling kaba donkam ban twad jingmut naki riewshemphang shuwa ban kynthup bun ka iodine haki jingbam jongphi.
2. KIAR NAKI JINGBAM BA KHLEIÑ:— Ka jingkynthup shibun ki jingbam kiba khleiñ ka buh jingma iaka koit ka khiah ha kiba bun ki liang. Ki khleiñ(fats) kidei kiba lah ban iaphiah hapdeng ki khleiñ kiba tei bad bymtei iaka met. Ki nongwadbniah ki shem ba ki khleiñ kidei kiba lah ban pynthut halor ka jinglah ka met ban kjit iaki thyroid hormones. Namarkata kalong kaba donkam ban pynduna iaki jingbam sdieh, ki jingbam ba khleiñ bad ki jingbam kiba ladep ban pynkhreh lypa ban lait na kane ka jingshitom.
3. KIAR BAN BAM IA KI KATTO KATNE KI JHUR:— Kalong kaba donkam ban kynthup ia bunjait ki jhur haki jingbam ba manla ka sngi, hynrei kidon napdeng ki katto katne ki jhur kiba don ki jait nutrients kilah ban ktah halor ka jingpynmih ki thyroid hormones. Katto katne ki jait jhur cruciferous kum ki Brussel, sprouts, kubi, phulkubi,sohlakum bad broccoli kiba phi dei ban bam antad ne pynduna lada don iakane ka jingshitom.
4. KI SOY:— Katkum ka jingpule lashem ba ki kynthei kiba bam bun ki jingbam ba ioh naki soy, kilah ban kham jur ka jingma ban ngat haka jingpang hypothyroidism. Kane ka dei namar ki jingbam ba ioh lyngba ki soh ki jur ban don ki estrogen bad ka jingdon kine ki estrogen haki soy kalah ban wallam ka jingbymbiang ka jingtreikam ha u thyroid. Kumta kalong kaba donkam ban pynduna ne kiar ban bam ki jingbam ba ioh na ki soy kum ki soymilk,soybean, soya sauce,bad ki vegan cheese.
5. CAFFEINE:— Ka jingjur palat ka caffeine kalah ban ktah bad ban khanglad halor ka jingkjit iaki thyroid hormones. Ban pynrung bun palat ka caffeine kalah ban ktah iaka koit ka khiah ha kiba bun ki liang. Ka jingpynrung bun palat ka caffeine kalah ban long ka daw halor ka jingthut thiah(Insomnia) bad ka jingshahktah halor ka jingtylliat jingbam hapoh ka met.

KI JINGBAM KIBA DONKAM BAD KIBA AI JINGMYNTOI HALOR KA KOIT KA KHIAH JONG U THYROID.

1. KI SLA JHUR JYRNGAM:— Ki sla jhur jyrngam kilong ki thymmei halor ka jingdon ki antioxidants bad ka magnesium, kine ki riewspah ruh halor ka jingdon ki minerals kiba lah ban aibor halor ka jingtreikam hapoh ka met bad ki kyrshan halor ka koit ka khiah jong u thyroid.
2. KA PYLLENG:– Ka pylleng kadei ka jait jingbam kaba ai jingmyntoi shibun halor ka koit ka khiah ha baroh ki liang. Ka jingdon ka selenium haka khangai pylleng kalong ka thymmei halor ka jingdon ka minerals ka balah ban iarap ban pynkylla iaki thyroid hormones T4 shaka T3. Ka pylleng kalah ban iarap ban kyrshan naka bynta ka jingdon kam ha u thyroid ba kynthup kum ka protein, Vitamin B, cholesterol bad minerals.
3. KI JINGBAM BA IOH NA DURIAW:— Ki jingbam ba ioh na diaw kidei kiba jur ka jingdon ka iodine, ki minerals kaba iarap halor ka jingtreikam bha jong u thyroid. Hynrei lada phi don lypa ka jingshitom ha u thyroid, kalong kaba donkam ban pynduna iakine ki jingbam ba ioh na duriaw, namar kine ki jingbam ki jur ban don ka iodine bad kane ka lah ban nangpynjur la jingshitom.
4. KI SOH EHSNEP:— Kine ki jait soh bunsien ki ju ai jingmyntoi naka bynta ka koit ka khiah jong ka met ha baroh ki liang. Ka jingkynthup iaki soh ehsnep kum u cashew, ki soh khyllem bad ki symbai pathaw ki long ki thymmei halor ka jingdon ka iron bad ka selenium kiba ai jingmyntoi naka bynta ka koit ka khiah jong u thyroid.
   Khublei.