Husiar na kiba ak babu ha ki bank

Shillong, 25 Nailur:
Ki pulit ki la kyntu ia ki paidbah ba ki dei ban husiar bha na ki mentuh kiba ak ialade kum ki babu ne ki ophisar jong ki bank da kaba phun ban pan ia ki jingtip ba iadei bad ki bank account jong ki briew.
Wat la bunsien la ju kyntu ia ki paidbah ban husiar na ki mentuh ban nym ai ia ki jingtip ba iadei bad ki bank account ne ATM, hynrei dang bun ki briew kiba ngat bad shah pynngop ha ki briew kiba phun da kaba kam ba ki dei ki nongtrei jong ki bank.
Ki pulit ki la ong ba kum kine ki briew ki don ka kynhun runar jongki kaba thmu ban tuh ban thiem da kaba pynbiej ia ki paidbah da kaba leh mynleh kum ki nongtrei jong ka SBI ne kiwei ki bank.
Na ka bynta kane, ki paidbah ki dei ban husiar ban nym ai iano iano ne pyni iano iano ia ki jingtip ba iadei bad ki bank ne ATM. Ki dei ruh ban buh ia ki mobile jongki ban ioh pdiang ia ki sms lada don eiei ka jingleh tuh ia ka ATM jongki. Lada don eiei ka jingpher ha ka ATM jongki, dei ban pyntip wut wut sha ki bank ne ki pulit.