Husiar ioh wan tuid ki Muslim na Assam, ong ka KSU

Shillong, 04 Jymmang:
Ka KSU ka la kyntu ia ki paidbah trai shnong ka jylla ba kin long kiba husiar ioh wan tuid ki Muslim sha kane ka jylla namar ka jingiakynad ha Assam.
Kumba 32 ngut ki Muslim ki la shah pyniap ha ki suba lehnoh NDFB (S) jong ki Bodo ha ka thain Baksa bad Krokajhar, ka Assam. Ki Muslim kiba shah pyniap ki dei suba khar Bangladesh bad na ka liang ka KSU ka la kyntu ban peitngor ioh kin wan phetwir na kitei ki jaka sah sha kane ka jylla.
Ka KSU ka la long kaba pynkhreh ban pyr khing bha ïa ka jingwan rung ki briew hapoh ka jylla namar khlem pep, kitei ki khar Muslim ki lah ban wan phet rieh sha kane ka jaka.
U Bah Auguster Jyr wa, General Secretary ka KSU u la ong ba ka seng ka la pynkhreh bha ban bthah ïa ki Unit, Circle bad ki District jong ka KSU kiba don ha khappud bad ka jylla Assam ba kin peitngor bad pyrkhing bha ïa ka jingwan rung ki briew kiba nabar khnang ban nym ailad ia kitei ki suba khar Bangladesh ban wan rung hapoh ka jylla.
U la kyntu ruh ïa ka sorkar jylla ba ka dei ban bthah ïa ki bor pulit ba kin pyrkhing bha ha Byrnihat bad kiwei ki jaka ia ka jingrung jingmih kiba nabar khnang ba kitei ki suba khar Bangladesh kiba sah ha Kokrajhar, Assam kin nym wan riehtngen hapoh ka jylla. Shuh shuh u la pynpaw ba ki briew kiba sah ha Kokrajhar bad Baksa District ki dei hi kiba wan na Bangladesh.