Husiar ia ki tiar siat, ioh shah knieh ha ki lehnoh Garo

Shillong,31 Lber:
Ka tnad kam pohing ka jylla ka la hukum bad sneng ia ki pulit pahara kiba la phah sha Ri-Lum Garo na ka bynta ban pahara elekshon, ba kin ym leh lyngkrang ia ki tiar siat jong ki bad ki dei ban husiar bha ioh ki shah knieh lut ha ki lehnoh Garo, namar ka la ong ba ki lehnoh Garo kin pyr shang ban knieh ia ki tiar siat.
40 kynhun ki bor pahara ba kynthup ia ka CRPF, Seema Suraksha Bal (SSB) bad ki shipai BSF ka tnad ka la dep ban phah kylleng ki jaka jong ka jylla khamtam ha kito ki jaka jong ka Ri-lum Garo bad ha South West Khasi Hills ba jur palat ki kam pyntriem ki seng lehnoh.
U Additional chief secretary (home department) u KS Kropha u la ong ba baroh 40 kynhun ki bor pahara ki la poi bad la phah sha kylleng ki jaka. Lah ban pynkynmaw ba ha ka taiew ba la dep, ka tnad kam pohing ka la ia shong pyrkhat ryngkat ka tnad pulit kaba la wan ban ia shim bynta ruh da u Chief Electoral Officer (CEO), Meghalaya halor katei ka kam.
Ka jingialang ba la pyniaid da u Acting Chief Secretary u bah PBO Warjri ka la shim ia katei ka rai ban hukum ia baroh ki tnad bor pahara kiba la phah sha Garo Hills ba kin long husiar bha na ka jingshah knieh suloi bad ruh ba ki dei ban beh wut wut lada don kano kano ka jingujor sha ki jaka pynlong elekshon.
U Kropha u la ong ruh ba la kdew ia ki bor pahara ia ki jaka ba long shyrkhei bha katkum ki rikod jong ki elekshon ba la dep ha ki snem ba la leit noh, bada la phah ruh kham bun ki bor pahara ha kito ki jaka.