Husiar ia ki nongpang ba wan poi ha NEIGHRIMS, ha shwa ka 5baje mynstep

U Dr. Tedros Adhanom Ghebreyesus, Director General, World Health Organisation (WHO) lyngba ka BBC u la appeal sha ki Ri ka pyrthei baroh ba ki dei ban long kiba pynkhreh bha ia lade ban iada na u khniang jingpang Coronavirus uba haduh mynta u la trei ha ki 77,150 ngut ki briew tang ha China bad haduh 2592 ngut kiba la iap; ha South Korea bad Italy ka la trei jur bha bad shawei shawei de.

Ka Sorkar Meghalaya jong ngi haduh katno ka la long kaba la pynkhreh ha kane ka bynta ngim tip; kumta nga sngew ba ka la dei ba ka Sorkar Meghalaya ka la dei ban pynkhreh ia ki lad jingiada kiba biang baroh bad ki nongsumar kiba la ioh jinghikai.

Ia ka jingwan rung ki briew sha ka Jylla jong ngi la dei ban phikir na man ki lad baroh, khamtam ia ka jingwan kit ia ki Nongpang ha NEIGRIHMS na kylleng ka North East khamtam haba man ka step (5.00 AM) ki la poi ha NEIGRIHMS. Ym dei shuh ban shah ba kin wan kit da ki Bus kumto, ki la dei ban wan kit da ki Ambulance bad shwa ban rung sha ka Jylla ki dei ban ioh jingbit, kata, ba kim dei kiba don ia ki dak ki shin ki ban lam sha ka jingpang Coronavirus, katba dang don kane ka jingma na kane ka jingpang Cornavirus.

Kane ka dei kaba kyrkieh ia ka Sorkar Jylla namar kam dei ban khie thiah ynda la ioh rung ka jingpang. Ka jingpynkhuid ia ki shnong ki thaw, ki lynti ki syngkien bad ki iew khamtam, kum ka Iewduh bad kiwei kiwei ki iew kumjuh. Ai ba ngin ieng kum uwei u briew ban iada ba kane ka jingpang kan ym ioh tang ban rung. Ka rukom bam ruh dei ban husiar shipor kumba ki paidbah ki la nang ban kiar na ki jain ki nep kiba wan na China ne Bangladesh, kumta ruh la dei ban kiar kum kaba bam snam jong kino kino ki jingri ne ki mrad. Ki jingbam ia ki khniang, ki doh ksew lah kaba kiar shwa shipor; kata, kano kano ka jingmlien ban bam sih dei ban ia kiar shwa shipor katba kane ka jingpang kam pat jah. Ainguh ia u Blei ba haduh mynta kam pat rung kane ka jingpang ha ka thain bad ka Ri India hynrei ngi dei ban husiar ba kan ym ioh rung la ha kano kano ruh ka rukom, namar ngi hap ialeh ia u nongshun uba ngim iohi. Ki jingduwai ki dei ban jur ba kane ka khlam kan ym rung.

Nga kyrpad ia ka Health Department kan iathuh kaei kaba dang duna khnang ban pynbiang namar ynda la dier ka por kam myntoi ban ai report, naduh u Health Minister haduh ki Officer Rangbah ki hap shim ia ka jingkit khlieh katba dang biang ka por. Ngi dei ka Jylla ba sahdien ha ka liang ka jingsumar, te mynta dei ban pynkhlain shwa ba kaei kaei kaba sniew kan jia – Prevention is better than cure. Kane ka dei ka jingmaham ia baroh kiba don mynta ha ka bor la ki Ministers ne ki Officers ki Doctors lada kim shim khia ban long kiba ha khmat duh ban iada ia ka Jylla halor kane ka phang kin hap ai jingkhein.

Bah HS Shylla