Hun ka EC ia ka kaiphod phiah constituency

Shillong, 13 Nohprah:
Ka Executive Committee (EC) ka KHADC ka la pdiang ia ka kaiphod jong ka Delimitation Committee halor ka jingphiah thymmai ia ki constituency.
“Baroh ki dkhot jong ka EC ki la sngew hun ia ka kaiphod jong ka Committee,” la ong u CEM u Bah Pynshngain N Syiem mynta ka sngi Thohdieng hadien ba la wai ka jingialang.
U la ong ba ka Committee ka la wanrah ia ka jingpynkylla malu mala halor ka jingphiah ia ki constituency ba la pas da ka Council.
“Hynrei, ngi hun ia kaei kaei kaba la leh da ka Comcittee” la ong u Bah Syiem.
Ha kajuh ka por, ka dorbar kyrpang jong ka KHADC kan long lashai ka sngi Saitjain ban iakren ia kane ka kaiphod jong ka Delimitation Committee.
Kham mynshwa, u Bah Syiem u la ong ba ka Executive Committee (EC) kam lah ban shim ia ka rai halor ka kaiphod namar ba kan shong ha ka dorbar ban pdiang ne em ia ka.
Hynrei ha kajuh ka por, la iathuh ba kiba bun ki MDC ki pdiang ia ka jingphiah constituency ban long kumba leh ia ka MLA constituency.
“Ka jingkhot ia ka dorbar kan long tang ka jingpyndep rukom” la ong ka thymmei khubor.
Katkum ka Delimitation Bill, ka Council kan thaw ia ka Umsning constituency da kaba pynduh noh ia ka Laitkroh constituency.
Da ka jingpynduh ia ka Laitkroh, ki jaka kiba hap ha kane ka constituency kin pharia noh sha ki MDC constituency kum sha Mylliem, Langkyrdem bad Sohra.
Ka Delimitation Committee ka la aiti ia ka kaiphod sha ka EC ha ka 9 tarik Nohprah.