Hukum ka tnat pulit ia ki paidbah ban husiar

Shillong, 26 Iaiong:
Ki bor pulit ki la iathuh ba don katto katne ki briew kiba pyrshang die ia ki tiar da ka phah ia ki SMS sha ki paidbah lane lyngba ki TV channels, kiba pynbiej ia ki paidbah ha ryngkat ki jingai sngewbha. La iathuh ba shisien ba phi phone ia kine ki number, kin ialeh ban phone biang iaphi ba phin thied da kaba phah ia ki tiar lyngba ka post office kaba hap ban siew da ka pisa beit. Hadien ba phi lah dep siew ka pisa, bad phi plied ia ka parcel phin shem tang u maw uba khia lane kino kino ki kynja maw ym dei ka tiar kaba phi thied, iathuh ki pulit. Kumta ki pulit ki kyntu ia ki paidbah ba kim dei ban thied kulmar ioh jia kumne, namar kine ki briew ki don tang kawei ka jingmut kata ban ioh pisa.