Hukum ka sorkar ia ki DC, ban pynsted jaka talasi mynder

Shillong, 3 Nailar:
Ka jingialang ki kynhun myntri sorkar kaba la long mynta ka sngi ka la hukum ia ki Deputy Commissioner jong baroh ki district ha ka jylla ba kin pynstet noh ia ka jingwad jaka ne ban shim jaka na ka bynta ban thaw ia ki jaka rung jaka mih ki mynder kiba wan ha kane ka jylla. Katei ka jingialang ka la mynjur ruh sa ia kiwei pat ki ar tylli ki ain ban khang lad ia ka jingwan rung kyr thep ki mynder sha kane ka jylla bad ia kitei ki ar tylli ki ain ba kynthup ia ka Benami bad ka ain shong wai kaba ka sorkar ka la ong ba kan wanrah ha ka iing dorbar thaw-ain ka jylla ka ban wan.
Katkum ki khubor na ka sorkar ka la ong ba ki DC ki la trei shaid shaid ia katei ka kam bad ki la don ruh ki jaka kiba ki la dep kdew na ka bynta ban shna jaka rung jaka mih ( Entry and Exit point) hynrei kaba dang sah ha ka jingiakren mynta ka long ban ioh ia ka khyndew bad hadien ba la dep ban ioh jaka kin thaw noh shen ia katei ka jaka rung jaka mih.
Shuh shuh la ong ba ia ka Meghalaya Benami Transaction Provision Act 1980 bad ka Meghalaya Regulation of Landlord and Verification of Residence Bill ka sorkar ka la dep pynkhreh bad kaba sah mynta ka long ban wanrah ha iing dorbar ban pynlong ain ia ka. Kham mynshuwa ki 13 sengbhalang kiba ia khih ILP ki la pynpaw ka jingsngew diaw namar ba la shisnem mynta ka sorkar ka khlem pat leh eiei halor ka jingdawa jong ki.