Hukum ka sorkar ban phah eksamin, 16 tarik yn die doh masi biang

Shillong, 13’lyngkot:
Ka seng ki nongdie doh masi ka Khasi Jaintia Butcher’s Welfare Association ka la pynbna ba kan plie biang ia ki dukan die doh masi ha kylleng ka jylla naduh ka 16 tarik mynta u bnai kaba dei ruh ka lah sngi u blei. Ia kane la pynbna da u Vice President katei ka seng u bah Generous Warlarpih, haba ia kren bad ki nongthoh-khubor. U bah Warlarpih u la ong ba ia katei ka rai ban plie biang ia ki dukan die doh masi la shim hadien ba katei ka seng ka la ioh jingthoh na ka tnad ri jingri ka sorkar jylla ha kaba la hukum ba baroh ki masi shoh doh ki dei ban shah eksamin shuwa ha ki doktor shuwa ban shoh doh ia ki bad shuwa ba ki nongdie doh kin thied ia ki na iew die masi.
U la iathuh ruh ba ia katei ka jing eksamin yn leh ha iew die masi kaba la pynim thymmai, kata ha Ranghona kaba don ha Byrnihat. Na bynta kito kiba dang bteng ban thied masi na iew Khanapara ruh u la ong ba ki hap ban shah eksamin shuwa ha ki doctor ha shiteng lynti la ki masi ba ki thied ki long ne-em kiba bit ban ot doh. Ia katei ka hukum la pynmih da u Dr.B.Rajai jong ka tnad Veterinary , Shillong.
Katkum ka jingiathuh utei u nongialam ki nongdie doh masi u la ong ba ha katei ka iew Ranghona yn eksamin ia ki masi shuwa ban thied bad yn thied tang ia kiba biang ban ot doh, u la ong ruh ba ia kijba dep thied yn ksam shkor kum ka dak ban ithuh ha kaba yn buh da ki nombar ha kitei ki jingksam shkor khnang ban tip ia u nongtrai nongthied uba yn buh ha ka ripod. Ia katei u la ong ba la leh khnang ba yn tehlakam ia ka jingiaid tuh ki masi sha Bangladesh bad lada jia ba ki masi kiba la dep ksam shkor kin iaid sha Bangladesh bad lada ioh bat yn tip uno u trai ba thied tang na kitei ki dak ksam shkor.