Hukum ka sorkar ban iaid kjat ki pulit ban iada jingsniew

Shillong, 24 Nailur:
Ka sorkar jylla lyngba ka tnad kam pohiing ka la bthah ia baroh ki OC bad IC ba kin pynlong ia ki jingpahara da kaba iaid kjat bad ki kali ruh ban iada bad khang lad ia ki kam sniew kiba lah ban mih ha kano kano ka jaka ha ka nongbah.
Ka tyllong khubor na ka tnad kam pohiing jylla, ka la ong ba ka sorkar ka la hukum ruh ia ki pulit ba kin iaid pahara khnang ban khang lad ia ki riew sniew kiba thmu ban shim kabu ban thaw jingkulmar.
“Kino kino kiba lap ba leh beain ban thaw jingkulmar, ka jingiadih iabam pathar ha lynti syngkien, ha surok kiba lah ban pynwit ia ki paidbah, yn kem bad rah naphang sha thanat ban pynngat ha ki kyndon ain”,la ong ka tyllong khubor na ka tnad kam pohiing.
Ka la ong ruh ba ki pulit kin peitngor bha ia kino kino ki jaka ba ialum paidbah bad la pan jingiatreilang ruh bad ki VDP jong ki shnong ki thaw ban tehlakam ia kane ka kam.
Ka tnad kam pohiing ka la ai bor ruh ia ki pulit ba kin pynlong ia ka jingkhynra ia ki jaka iadih kyiad beain, ki jaka die kyaid beain bad ban kem ia kiba leh pyrshah ia ka ain.
“Ka jingdon ka kor ring dur ne CCTV ha ka nongbah ka la iarap shibun ia ki pulit ban tehlakam ban ioh kem ia ki briew kiba don kti ha ki kam bymman ha kylleng ka nongbah”, la ong ka khubor na ki pulit.
Katkum ka khubor na ki pulit, la don haduh 135 ngut ki briew kiba shah kem hapdeng u snem 2013 haduh 2015 haduh mynta ka sngi.
“Ki pulit kin iai bteng ban leh ia kane ban khang lad ia kino kino kam sniew”, la ong ka tyllong khubor.