Jowai: Ka Dorbar Chnong Tympang, Jowai ka pyntip ha ki dkhot ka Chnong, ki Trai Iing, Trai Jaka, ki Nongshongwai bad Nongshong Shnong hapoh u pud u sam ka Dorbar Chnong Tympang, Jowai ba katkum ka Meghalaya Residents Safety and Security Act, 2016 ha kaba baroh ki trai iing ba ai wai sha ki briew ba wan na kiwei pat ki shnong kin hap ban pynbiang ia ki kot ki sla kiba donkam ia ki nongshongwai.
Ia kine ki kot ki sla kiba ki nongshongwai kin hap ban pynbiang yn buh iaki ha Office ka Dorbar Chnong, kumjuh ruh shi kopi yn phah sha Jowai Police Station. Ki kot ki sla ki ba ki hap ban pynbiang ki long Ka Residential Certificate na ka Shnong ba ki wan ne ka shnong ba ki shait sah, kumjuh ruh kin hap ban soi ha ka Form A ba la type ha ka Non – Judicial Stamp Paper ba 10 tyngka, ban hap sakhi da ki ar ngut ki briew ba ithuh, ha kaba uwei u dei uba na ka shnong trai uba shongwai. Kawei ka kopi jong ka EPIC (Voter ID) ne ka ration card na ka shnong ba ki wan. 2 tylli ki dur pass port jong baroh kiba sah lang ha kajuh ka iing wai. Lada dei u/ka khynnah pule, donkam ka Certificate na ka jaka pule neka Identity Card kaba na ki skul/college/university.
Ki dei ruh ban kynmaw ba ki don 2 tylli ki Form A bad B, ka Form A ka ban hap type ha ka Non Judicial Stamp ba 10 tyngka bad ka Form B ka dei ka ban pyndap da ki trai iing ia ki Nongshongwai (ia kine ki Form lah ban ioh na Office ka Dorbar Chnong).
Ki Dkhot ka Executive Committee ka Chnong ki lah ban wan jurip bad ban sylli bniah ia ki kot ki sla kiba dei ban pynbiang katkum katai ka aiñ, ha kano kano ka por, la kyrpad ruh ia ki nongshongwai ba kin sngewbha ban long kiba la pynkhreh.
Na ka liang ka Dorbar Chnong kan buh ia ka Register, kumjuh ruh ka file ban suh lang ia kine ki kot ba donkam baroh, kiba yn hap ban pynshisha ia ki Pulit (Police Verification) hapoh 90 (khyndai phew) sngi naduh ba la pynmih ia kane ka khubor. Ia ka jingtip ba kham bniah lah ruh ban wan pule ia kane ka aiñ ha office ka Chnong, man ka janmiet ha ka por 6:00 Pm haduh 7:00 Pm.