Hukum ban khang tih bad shalan dewiong ha Meghalaya

Shillong, 21 Iaiong:
Ka National Green Tribunal ka la hukum ia u Chief Secretary ka jylla bad u Director General of Police, ka jylla ban khang lad ia ka jingtih dewiong be-ain ha ka jylla, ha ki rukom tih thliew khnai, kaba la ju leh ha Jaintia hills bad ha kiba bun bah ki par dewiong ha West Khasi, Garo hills ruh kumjuh. Ka la hukum ruh ia ki bor sorkar bad ki bor pulit ba ki dei ban peit bha ba ym dei ban ailad ban

khaii dewiong be-ain, kat bym pat pynmih da kawei pat ka hukum. Ia katei ka hukum la pynmih naduh ka 17 tarik u iaiong 2014 bad ia ka jingbishar kaba bud kan long ha ka 19 tarik u jymmang 2014.
Katei ka jingialeh mukotduma, ba la ujor da ka ka All Dimasa Students Union Dima Hasao Dist. Committee pyrshah ia ka sorkar jylla hakhmat ka National Green Tribunal , Principal Bench , New Delhi bad katei ka mukotduma, ka hap hapoh ka jingbishar u Justice Dr. P.Jyothimani, U Justice M.S Nambiar, U Dr. GK Pandey, U Prof. (Dr.) P C Mishra bad u Ranjan Chatterjee.
La kdew ba ka jingtih dewiong kaba ju leh ha ki thain Jaintia ha ka rukom ‘ka tih thliew khnai’ , ka dei kaba don jingma tam na bynta ki paidbah khamtam ha ka por slap haba ka thliew ka dap um ka ju wanrah ia ka jingiap kiba bun ngut kumjuh ruh ki nongtrei ha kitei ki par dewiong. La wanrah ia ka kaiphod, kaba la pynkhreh da u Dr. O P Singh , Professor, Department Environment Studies , North Eastern Hills University, Shillong bad ha katei ka kaiphod jong u la pyni baroh ki jingma na ka jingtih dewiong ha ka rukom tih thliew khnai.
Nalor katei ka rukom tih dewiong, la pyni ruh sha ka Tribunal ia ki jingma lyngba ka ki jaka pynlang dewiong, kiba la buh ha shilynter ki surok bah na ka bynta ban pynkit bad khaii sha kiwei ki jaka. La pyni ba katei ka rukom pynlang dewiong ruh ka wanrah ia ka lyer bih kaba wanrah jingma ia ka koit ka khiah. La pyni ruh ia ki jingduh ki khlaw ki btap ha katei ka rukom tih dewiong, namar ba shuwa ban tih thliew khnai hap ban pynsyllen lut ia baroh ki dieng ki siej kiba don halor u lum ba don dewiong.
Lah ban pynkynmaw, ba ha u snem ba ladep, ka PHC jong ka Rymbai, ka la kynriang, na ka daw jong ka jingtih dewiong shathie shapoh ramew bad kumjuh ha u snem 2012, ka la don ka jing orpait ha ka shnong Sohkymphor bad katei ruh, la shim, ba ka dei na ka jingtih dewiong shapoh ramew.
Lada kane ka hukum, kaba mynta, kan treikam, kan long sa kawei pat ka rai ka ban ktah ia u paidbah ba bun balang, la kumba khang ia ka jingpom dieng, kaba la pynmih hukum, ha u snem 1996 bad kaba la ktah shibun eh, ia ka ioh ka kot, khamtam sha West Khasi Hills.