HNLC, ka seng runar ne ka seng iakhun laitluid:RG

Shillong, 6 Iaiong:
U Myntri sorkar barim ka tnad kam pohiing u bah  Robert G Lyngdoh  u la ong ba ka sorkar jylla ka dei ban kren shai la ka seng  HNLC ka dei ka seng runar ne ka seng ialeh Laitluid.
U bah Lyngdoh u la ong ba ka jingiasangeh iasiat ka mut ba ka HNLC ka dei ban sangeh ban rah suloi, sangeh ban wanrah ia ka jingma ha ka imlang sahlang.
“Kaba sngewsih ka long ba mynta ngi la peit ia ka jingsangeh iasiat kum ka lad ban poi sha ka lynti ka jingiasuk hynrei ka bym urlong”  u la ong haba iakren bad ki nong thoh khubor mynta ka sngi Balang.
Haba kylli shaphang ki skhim jingiarap ka sorkar, u Bah Lyngdoh u la ong ba ki jingiarap ka sorkar lah ban ktah ia ka imlang sahlang. U la buh jingkylli, ki briew paidbah kiba im ha ki surok kim ioh ia ki jingiarap na ka sorkar, katba kumno ki lehnoh ki ioh ia ki jingiarap na ka sorkar.  
 ”Kum ka sorkar, kaba shim ia ka rai ba kine ki briew ki dei ki runar, ka dei ban leh ia ki kum ki runar, kam dei ban ai ia ka burom.  Ka long biej ia ka sorkar ban iakren ia ka jingkhot iakren lada ka sorkar ka khein ia ki HNLC kum ki runar”, la ong u Bah Lyngdoh.
U la ong ba ka jingsangeh iasiat kam dei ka lynti ban poi sha ka jingiasuk hynrei ka dei ka lynti ban wanrah ia ka jinglong jingman kaba ki briew ki lah ban iakren bad ban wad ia ka lynti sha ka jingweng ia ki jingeh.
 ”Ka long kumba iathuh ba ki long lehnoh nyngkong bad phin sa ioh ia ki jingiarap bad kane ka long kaba sniew. Ka lah ban phah ia ka khubor kaba bakla bad dei ban peit bad pyrkhat bha ia kane”, la ong u Bah Lyngdoh.
U la ong ba ka sorkar ka dei shim ia ka  jingwan pyndem jong ki HNLC da ka mon shimet. “Haba ngi shim ia ki dkhot da ka mon lajong jongki ban wan pyndem, ka jingiarap ka dei ban ai shimet. Ka jingshim ia ki kum ki riew shimet haba ki wan pyndem da ka mon, kan long katkum ki jingkynnoh ba ki la leh. Hynrei haba ngi shim kum ki kynhun, kane kan shu pulom kai”, la ong myntri kam pohiing barim ka jylla.