Hikai sengkam ka KCYS ha Kynshi

Shillong, 8 Nailur:
Ban hikai ia ki samla ban seng kam lajong khamtam kito kiba iakynduh jingeh ban bteng ia ka jingpule, ka Kynshithem Christian Youth Society (KCYS) ka la pynlong ia ka jingialang pynshai paidbah ha shnong Kyn shi ha kane ka sngi Nyngkong.
Da ki spah ngut ki samla ki la wan ban iashim bynta ha kane ka jingai jinghikai kaba shi sngi.
Ki nonghikai kynthup ka Kong I. Lyngdoh Mawnai ka Vice Principal Mairang Science College ka la long ka nongpynshai kumno ki samla kiba bteng ha ka jingpule kin jied hadien ba la dep pule ia ka klas 12.
U Bah Teibor Pathaw na ka North East Security Academy (NSA) u la ai jingpynshai ia ki samla kumno ban seng ia la ki kam khlem da shaniah ha ki kam sorkar.
Ka Dr Rimiki Lamare na ka tnad AH & Veterinary Officer Mawthadraishan Block ka la kren ia ki kam ri jingri ba ki samla kin shim kum kawei na ki lad ban seng ia la kam lajong ha ki jaka nongkyndong.
U Bah KD Kharkongor u District Training Officer, Farmers Training Centre, East Khasi Hills u la batai ia ka jingai jinghikai halor ka rep ka riang ba ki samla ki dei ban shim ha ka rukom kaba ioh nong bad kaba myntoi.
Ia kane ka jingialang la pyniaid da u president ka KCYS Bah Powel Sohkhlet.