Hikai kyrpang ka NYKS ia ki samla kynthei, ban iada na ka jing thombor

Nongpoh: Namar ba la jyllei palat ki kam thombor pyrshah ia ki riew kynthei, na ka liang ka Nehru Yuva Kendra Sangathan, Nongpoh, ha ryngkat ka jingiatreilang bad ka Group & Pound MMA Gym, Meghalaya, ki la pynlong syndon da ka prokram kaba la ai jinghikai kyrpang ia ki samla kynthei ba kumno ba kin nang ban iada ialade, lada don kino kino ki shynrang kiba thmu ban lehsniew.

Ki nonghikai na ka Group & Pound MMA Gym, kiba la hikai ia ki samla kynthei ban iada na ki kam shah thombor

Katei ka jinghikai kaba la pynlong arsngi kynthih, la pynlong ha ka shnong Lumsohphoh Nongpoh, ha kaba ki la don kumba 54 ngut ki samla kynthei na ki jaka bapher bapher, ki la wan ban iashimbynta shitrhem bad ha katei ka prokram, ki la ioh ruh ia ka jinghikai kum ka Mix Martial Arts, Fitness bad ba kumno kin nang ban iada ialade (Self Defense).
Ia kitei ki 54 ngut ki samla kynthei, la ai jinghikai kyrpang da ki nonghikai kiba tbit, kiba kynthup ia u Bah Cores Marwein, President ka Ground & Pound Gym, u samla Anthony Syiem, ka samla Apdalin Marwein, ka Jenny Ingtih kum ki Instructor lem bad kiwei kiwei.
Ka jingthmu jong ka NYKS bad ka Group & Pound MMA Gym, Meghalaya ban pynlong ia katei ka prokram ai jinghikai ia ki samla kynthei, ka dei hadien ba ki la iohi ia ka jingjyllei ki kam thombor pyrshah ia ki riew kynthei. Kumta na katei ka jinghikai ba arsngi, kitei ki samla kynthei ki la ioh shibun ki jingtip ba kin iada ialade na ki kam shah thombor.