Hikai ka SURE ban burom tymmen

Shillong, 19 Jylliew:
Ka Society for Urban and Rural Empowerment (SURE) ha ryngkat ka jingiatreilang bad ka Ophis jong ka District Social Welfare Officer West Jaintia Hills District, Jowai kala pynlong ia ka jingai jinghikai kumno ban burom iaka tymmen ki san haka Community hall jong ka shnong Ummulong haka 18 tarik u Jylliew haka jingia donlang ki nonghikai bad ki khynnah skul jong kane ka shnong.
Kane ka jingai jinghikai ka iajan ruh bad ka 15 tarik u Jyliew kaba long ka sngi ban ai jingtip pyrshah iaka jingleh tohmet ia ki tymmen ki san ne kata ka ‘World Elder Abuse Awareness day.’ Na ka liang jong ka ophis jong ka DSO la ia don lang u ma Phrang Chyrmang uba long u Supervisor jong kane ka ophis bad ha ka jingkren jong u, ula batai shaphang ki jingiarap kiba ka sorkar ka ai ia ki tymmen ki san kum ka Financial Assistant for Medical treatment, ne ka jingiarap kaba shisien shisnem ia ki tymmen ki san kiba pang kiba shitom bad ka jingiarap ka long T.2200/- shisnem. Nangta ka don ruh ka jingiarap kum ka penshon tymmen kaba lah ban ioh na ki Block ophis jong kane ka department, kumjuh ruh ka jingai khusnam ia u ne kano kano ka briew kiba la dap ka rta 100 snem kynthih.
U ma Phrang ula ong ruh ba na ka liang jong ka sorkar ka pyrshang ban wad lad ban ioh ia ki jaka ba ki tymmen ki san kin shong kin sah ne kita ki shelter home. Haka jingbatai jong u; ula ong ruh katkum ka jingkhein sorkar, la niew tymmen iaki kynthei haba kila dap 60 snem ka rta katba ia ki shynrang pat ynda kila dap 65 snem ka rta. Namar kata tang kiba la kot ia katei ka rta kin ioh iaka jingiarap naka sorkar.
Haba kren shaphang ka jingshah leh tohmet jong ki tymmen ki san, u H.H.Mohrmen uba long ruh u president jong ka SURE ula ong ba dang shen (2014) ka Help Age India kaba long kawei na ki seng kaba trei kam ha kaba ia dei bad ki tymmen ki san; kala pynlong iaka jingjurip survey bad la lap ba ka jingburom jong ki samla iaki tymmen ki san kala nang hiar ha kane ka ri. Kiba bun ki samla kim salia shuh ha kaba ia dei bad ki tymmen ki san bad lada jia ba ki donkam jingiarap ruh, kim don por ban iarap ia ki. La lap katkum ka survey kaba lapynlong ha ki 20 tylli ki shnong ba haduh 50 naka shispah ki tymmen ki san ki iathuh ba ki shah leh bein ne shah lehtohmet haka jinglong tymmen jong ki. Kiwei pat kiba la kren ha kane ka jingialang ki dei u ma Marbait Kyndiah bad ia kane ka jingialang la pyniaid da u ma B.S. Shylla uba long ruh u secretary jong ka SURE.