Hikai ka ATMA ban pynshlur ia ki nongrep ha Ri Bhoi

Nongpoh, 18 Risaw:
Shibynta ban kyntiew ia ka rep ka riang hapoh ka District, ka Agriculture Technology Management Agency (ATMA), Ri Bhoi District, lyngba ka Pradhan Mantri Krishi Sinchai Yojana (PMKSY) mynta ka sngi ka la pynlong ia ka ‘One Day Training Programme on Water Conservation’ ne ka jinghikai ba shisngi ia ki nongrep halor ka rep ka riang bad halor ka jingpynneh pynsah ia ki um ki wah, ha District Horticulture Training Hall, Saiden.
La sakhi ruh ha kane ka sngi da ka jingdonlang ki heh ophisar ba kynthup ia u Bah K.D Kharkongor, District Agriculture Officer, u Bah H.S Nadon, EE ka Water Resource, u Bah Mawjam Makdoh, Horticulture Development Officer, u Bah F. Kharsyntiew, Project Director ka ATMA lem bad ki nongrep na ki 3 tylli ki C&RD Block kiba don ha Ri Bhoi.
Ha kane ka sngi ki heh ophisar kiba dei peit ia ka kam rep kam riang bad ka jingsumar ia ki um ki wah hapoh ka Distrik, ki la ai jinghikai sha ki nongrep shaphang kumno ki lah ban nangpynheh ia ka kam rep jong ki ha kata ka rukom kaba dei, ha ryngkat bad ka jingiada ia ka Mariang. Haba hikai ia ki nongrep ha kane ka sngi, u Bah K.D Kharkongor, DAO ka Ri Bhoi, ha kaba nyngkong eh u la pynpaw ia ka jingsngewdiaw halor ka jingduna ki paidbah kiba shim ia ka jingkitkhlieh na ka bynta ban kyntiew ia ka kam rep ha ka jylla, namar ba bun ha kine ki sngi ki briew kim kwah shuh ban rep, naba ki la iabeh beit tang ha ki kam sorkar.
“Balei ki nongrep kim lah ban kiew ha ka kam rep ka riang jong ki? Ka daw hi ka dei namar ba ki shim sting bad kim shim kum kata ka kam kaba ai jingmyntoi ia ki, ha kajuh ka por ka kam rep kam riang kam iapher na ka Bussiness, namar haba rep ba riang donkam ruh ia ka jingkhein jingdiah, hynrei bun na ki nongrep hapoh ka jylla kim shimkhia bad kane kaba pynlong ia ki ba kim lah ban kyntiew ia ka kam rep” u la ong.
Kumta, kum u khlieh ba dei peit ia ka kam rep kam riang ha ka Distrik, u la kyntu ia ki nongrep ba kin bteng ia ka kam rep bad ha kajuh ka por u la pynshlur ruh wat ia ki samla pule kiba la pyndep ia ki jingpule bapher bapher ba kin phai khmat sha ka kam rep, namar kumba tip ba ki Nongrep ki dei u Budlum ka ioh ka kot, u la bynrap.
Ha kane ka sngi ki nongrep ki la ioh ruh ia ka jinghikai shaphang ban sumar ia ki um ki wah ia kaba la hikai u Bah H.S Nadon, uba dei u EE ka Water Resources bad ka jinghikai shaphang ka jingpyndonkam ia ka um ha ka por bathung ia ki jingthung jingtep ia kaba la hiukai da u Bah Mawjam Makdoh, Horticulture Culture Development Officer.