Hiar U SDPO ban teh lakam ia ka shongsuk shongsain Bam eit u rangbah, ba shah kynnoh ai ksuid ha Mawryngkang

Shillong,22 Naitung:
Ka la mih ka jingia kynnoh ai ksuid ha ka shnong Mawryngkang kaba don harum Pynur sla, ia u Bah Nopin Khong sit uwei na ki nong shong shnong katei ka shnong, uba don kum ba 65 snem ka rta. Katei ka jingshah kynnoh, ka dei hadien ba kiba bun ki ba la ioh ia ki jingpang khleh biej ha katei ka shnong, ki ia khot ia pyrta ia ka kyrteng jong utei u rangbah.
Kumta halor kitei ki jingkynnoh, ka Dorbar Shnong ka la khot ia utei u rangbah sha ka dorbar kaba la long ha ka 20 tarik mynta u bnai ban ia kren shaphang katei ka jing kynnoh ha kaba na katei ka Dorbar ka la mih ka rai ba u Bah Nopin u dei ban bam eit. Halor katei ka rai jong ka Dorbar Shnong, U bah Nopin, ula pyndem ialade, ha ka rai jong ka Dorbar ha kaba u la bam ia ka Eit briew.
La ioh jingtip ruh ba ki la mih ki jingbyrngem hapdeng ki paidbah ia utei u rangbah, namar kitei ki jingkynnoh men aiksuid ha kaba utei u rangbah, ula phah ia ka jingujor sha ki pulit bad halor katei ka jingujor, la sngewthuh ba ki pulit ki la khot bishar ia ki briew, kiba la shah kynnoh, ba ki dei ki nong byrngem bad kumjuh ia U bah Nopin, kum u nong ujor, hynrei ka dei hadien ka jingshim khia jong ka shnong ,ba la pynbeit ia katei ka kam bad la lah ban weng ia ka jingujor bad ba la pyniasuk hapdeng utei u nongujor bad kiba shah ujor ha khmat jong ki pulit ha Pynursla.
Ha kawei pat ka khubor, la iathuh ba hadien ba ki pulit , ki la ioh ia katei ka jingujor halor katei ka jingkynnoh nongshohnoh; kumta mynta ka sngi, U Bah Ian Swer SDPO Sohra ryngkat bad u Bah W.Biam ki la hiar sha Mawryngkang mynta ka sngi, ban pynlong ia ka jingialang paidbah ha Ing Dorbar jong ka Shnong Mawryngkang ban pynshai ruh ia ki paidbah ba kum kine ki jingjia, kin ym jia shuh bad lada don eiei ka ain hi kan pynshitom khlem map iano iano ruh.
Ki pulit ki la kyntu ruh ia ki paidbah ba ki dei ban ia shongsuk shongsain hapoh shnong pohthaw bad ym dei ban ia tharai sniew iwei ia iwei.La pynlong ia katei ka jingialang ha ryngkat ka jingiadonlang jong ki VDP Shnong bad ki Sengkynthei.