Hiar U CEM ka KHADC ban ialap jingkylla ha Khliehriat

Jowai, 22 Jymmang:
U Chief Executive Member ka Khasi Hills Autonomous District Council ha ryngkat u EM in-charge ka Elaka, u bah Latiplang Kharkongor ki la hiar mynta ka sngi sha Khliehriat ban ia shim bynta ha ka Campaign for Change lane ka jingialap ban rah ia ki jingkylla hapoh ka jingialam khmat ki samla kiba pule ha skul bah NEHU kynthup ia u Chairman ka CFC, u bah M. Warjri bad kiwei kiwei.
Haba kren ha ka jingialang, u bah PN Syiem, CEM ka KHADC u la ong “”Ngi ki Nongmihkhmat ngi la phiel ha baroh ki liang. Ngi la pheil ban iada ia ka hok longtrai namar ngin don ki ain kiba shai, ngi la pheil ban iada ia ka khyndew ka shyiap, ia ka ri bad ka jaitbynriew. Hynrei ngi dang don ka jingkyrmen namar ba ngi don ka Sixth Scheduled bad ngin iai dawa ban pynkhlain ia ka Sixth Scheduled”.
“Na ka daw ba ngi kwah bor bad ngi buaid spah, ngim don ia ki Nongmihkhmat ki ban thaw-ain (Law-Makers and Policies Makers)”, la ong u bah Syiem.
Ka jingshah khangtih dewiong ka la jia tang ha Meghalaya ha kaba ka la ktah shi katdei eh ia ka ioh ka kot jong ki paidbah ka East Jaintia. “Ha Meghalaya la khang katba ka Assam ka ioh ban tih dei namar ngi don ka Mining Regulation bad ka Mining Policy ka bym shai”, u la bynrap. Utei u Nongialam ka KHADC, u la ong “Dei namar ba ngi la kmen palat ban ioh ia ka jylla, la klet pat ban thaw ia ka ain ka ban iada ia ka ri bad ka jaitbynriew rit paid jong ka jylla”.
U la ong ba ha ka jylla Nagaland, lada ki ain ka sorkar kmie kim iahap ba ka jylla Nagaland, tang ka bor jong u Governor la biang ban pynsangeh ia ka jingtreikam ki ain ka sorkar kmie, katba ha Meghalaya ka jylla kaba hap hapoh ka Sixth Scheduled ki ain jong ka sorkar India ki lah ban treikam wat lada kim iahap satia bad ki paidbah ka jylla bad ban pynkylla ia kane hap ban leit rah shaduh u President ka ri India kumba la jia ia ka VAB jong ka KHADC.
“Kane ka jia namar ba ngin don ia ki ain kiba shai. Ngam tip kan jia aiu lada ki Nongmihkhmat jong ngi kin nang ban thaw-ain. Ngi donkam ban jied ia ki Nongmihkhmat kiba pule kot bad kiba sngewthuh ia ka ain”, la ong u bah Syiem.
Ha kane ka jingialang la iohruh ka jingkren na u MDC ka Nongthymmai, u bah Latiplang Kharkongor, u CEM barim ka JHADC, u ma Obil Kyndait bad u ma Heraldson Dkhar nalor kiwei pat.