Shillong: U Myntri ba dei peit ia ka koit ka khiah ha ka Jylla, u bah A. L. Hek mynta ka sngi, u la leit sha ka nongbah Delhi ban iakynduh ia u Myntri Rangbahduh ka Ri, u Narendra Modi, ia u Myntri ka kam Pohïing, u Amit Shah bad katto katne ngut ki myntri ka sorkar pdeng jong ka seng BJP.
Ia kane ka jingleit u bah Hek sha nongbah Delhi ka long ban kyrpad ia ka sorkar kmie ba kan khot iakren iasuk bad ka seng lehnoh jong ka Ri Khasi-Jaintia, kata ka Hynñiewtrep National Liberation Council (HNLC).
“Ngan leit iakynduh ia u Myntri ka kam pohïing ha une u taiew bad ngan sa iakren halor kane ka mat ban kren iasuk noh bad ka HNLC, ong u Bah A.L Hek.
“Ka HNLC dang shen ka la phone sha nga bad ka la kloi ban wan sha ka miej iakren iasuk bad ka sorkar,” u la ong.
U la ong ruh ba ia kane ka rai yn shim sha ka sorkar pdeng la kan aibor ne em ia ka sorkar jylla ban khot ia kane seng HNLC sha ka jingiakren.
U bah A.L Hek u la ong ba ha ka jingleit jong u sha Delhi, un sa iakren ruh halor ka kynrum kynram jong ka North-Eastern Hill University (NEHU) na ka bynta ka jingpyrshah jong ki nonghikai bad ki khynnah pule halor ka jingbteng jong u Prof. S.K Srivastava kum u Vice-Chancellor. Un sa iakren ruh halor ka kam ban pynmih pisa na ka bynta ka jingiakhun pyrshah ia u khñiang jingpang COVID-19 ha ka jylla.
Phi don ban ong eiei?