Hiar tohkit ka HANM, ba shah ktah kti u nongniah trok ha khyrdop lum pisa Diengpasoh

Shillong: Ha ka 18 tarik u bnai Lber 2020, ka seng Hynniewtrep Achik National Movement(HANM) Central Body ryngkat bad ki dkhot ka seng na Ri Bhoi District ki la leit ban pynlong ia ka jingtohkit ha ka khyrdop khrong pisa jong ka National Highway Authority of India kaba don ha ka shnong Diengpasoh East Khasi Hills District hadien ba ki la ioh ban pdiang ia ka jingujor halor ka jingshah ktah kti jong uwei u nongniah trok u ba dei u trai jylla na Jowai West Jaintia Hills District kaba la jia ha ka 16 tarik u bnai Lber 2021 ha ka por kumba 12 baje shiteng synnia ha ki nongtrei kiba ju khrong pisa ha kane ka khyrdop man la ka sngi.

Hadien ba ka seng ka la dep ban pynlong ia ka jingtohkit ka la dawa na ka pulit ba ka dei ban kem noh mar mar ia ki briew kiba donkti ban shoh ban dat haduh ban da mynsaw ia une u nongniah trok bad ban beh noh syndon na kane ka jaka kaba ki trei ki ktah.

Shuh shuh ka seng ka la maham ruh ia baroh ia ki barjylla kiba trei kiba ktah ha ki toll gate jong ka National Highway Authority of India ba kim bit ban leh baheh bad pyni bor ia ki trai jyll bad ka seng ka la maham ruh ba lada kine ki barjylla kim sngap ia kane ka jingmaham, ka seng ka la byrngem ba kan leh da kaba tyngeh.

U nongialam jong kane ka seng u la ong, “Ngi kyntu sha baroh ki toll gate kiba don hapoh Meghalaya ia ki non-tribal, sngewbha wat nym pyni da ka bor ia ki paradohki parasnam ki jong ngi. Lada ka nang iai jia na ka por sha ka por, ngi na ka liang ka HANM, ngim banse ban pyni da ka bor. Haduh mynta ngi dang burom ia ki non tribal hynrei lada kumne shi kumne ki pyni bor, kan sa poi ka por ba na ka liang ka HANM, ngin sa dat ngin sa shoh ia kine ki non tribal kiba shong ha kane ka Ri baieid ka jong ngi. Nangne shakhmat lada ngi lap ba kum kane ka jingjia kan jia, na ka liang ka seng ngin leh ia kaba donkam bad ngin nym ailad ia kine ki khyllah jait ba kin leh donbor ha kane ka Ri baieid eh ka jong ngi”.

Shuh shuh ka seng ka la ong ruh ba na ka por sha ka por la ju iohi ba lada u non tribal u shah ktah kti bad shoh ia u paradoh parasnam u jong ngi, u lait ban shah kem, hynrei lada u Khasi, u shoh ia u dkhar tang hapoh shiteng kynta ne shikynta la ioh ban kem noh ia u namar ba ka aiñ, ka iashah ia ki non tribal bad dei na kata ka daw ba sa jyllei ka jingleh heh jong kine ki non tribal, hynrei ka aiñ ka dei ban iada iangi u trai ri u trai muluk ym ban iada ia u non tribal uba shu wan nangno nangno.