U nongrep, uba la sohsat palat, halor ka jing pynjulor jong ki khnai ia ka lyngkha rep jongu, kumta, ula shna da ka tyngier, ba la pyndait da ki nar kiba pei thliew bad hapoh jong kitei ki nar, la pynap da ka ding kaba khlain bha bad kitei ki khnai, kiba leit hap ha katei ka ding, ki la ingkhop bad kylla dpei ei khamakha.
Katei ka dei ka jingjia, kaba la jia ha Australia, ha kaba ki khnai da ki million tylli, ki la leit bam duh ia ki jingthung jingtep ha kine ki sngi, khamtam ia ki jingthung kba.
Ha ka video la pyni, ba da ki hajar tylli ki khnai, ki la leit rung ha katei ka thliew bad ki la hap ha ka ding kaba la thaw ha ka dur jong ka synduk kaba heh bad kaba khlain bha, ha kaba ki la ingkhoit khait.
Utei u nongrep, uba kyrteng U Andrew, u pyni, ia la ka jong ka jingriam khnai, ha ka video kaba la pynmih ha ka TikTok bad nangta sa ka jing jyllei sat ki khnai, ha ki lyngkha rep ha New South Wales. U Andrew, u kam ba kitei ki khnai, ki la rung lut sha ki jaka trei, ki mashin bad ki tiar kiba la buh ha pynthor kba.
La iathuh ba ki don da ki million tylli, ki khnai, kiba leit buhai shnong ha kine ki sngi, ia kumba shi hajar kilometre ka jingjngai bad kaba kynthup na Brisbane sha Melbourne bad kitei ki la pynjor thiaw ia ki lyngkha rep, mynta la phra bnai kynthih. La iathuh ba kitei ki khnai, lada ki don tang ar tylli, ki la lah ban pynmih ia 400tylli, tang hapoh lai bnai bad nangta ki sa nang kha bad pynmih da ki phew phew hajar tylli.
U Xavier Martin, u vice president jong ki nongrep ha katei ka jaka, u kam ba ki nongrep, ki la iehnoh, ia la ki jong ki lyngkha jongki, namar ba mynta, ki la shlei smam, da ki khnai suda, kiba la bam duh ia ki jinthung jingtep jongki bad mynta, ki shim, ba kito ki jingtrei shitom jongki, ban thung ban tep, ki la shu pulom lut khait, ha ki khnai.
Ka sorkar Australia ruh, ka la don ha ka jing kutlad kaba khraw, namar ba kam don bih shuh ban pyniap ia kitei ki million tylli ki khnai.
Kitei ki khnai, kiba la bun bah, kim shym la pynjot satia tang ia ki lyngkha rep, hynrei, mynta, ki la poi sha ki iing briew, ki la rung sha ki skul, ki hospital bad kylleng ki shnong ki thaw bad mynta, la iathuh ba kitei ki khnai, ki la dap ha ki shnong ki thaw sa ha Sydney ruh bad ka lad pathai khubor jong ka sorkar Australia kaba la tip kum ka Channel 10 News Sydney, ka pyni ba ha U Nailar jong une u snem, kitei ki khnai kin sa leit hiar thma ia ka nongbah, kaba heh tam jong ka Australia, ka Sydney bad kin sa pynjulor ia ki jingbam jingdih, ki iingshong iingsah bad ki jaka trei kam jong ki tnat sorkar bapher.
Ka jing julor jong ki nongrep, ka long kaba la jubor bha haduh katta katta, ha kaba ki la duh ia ka kamai kajih jongki, ka shongdor da ki bun bun phew lak, ki marbam mardih, kiba ki la dep pynlang shitom baroh shisnem.
Phi don ban ong eiei?