Hiar thma ki khar Bangladesh, ha ka shnong Amdoh, mynsaw ar ngut ki BSF

Shillong: Ki khar Bangladesh, ki la hiar thma ha ka shnong Amdoh ha ka thain West Jaintia Hills Meghalaya.

La ioh khubor ba mynta ka sngi, dang step phyrngab, ha ka por kum ba 3 baje mynstep ka kynhun ki khar Bangladesh ki ba don kumba 13-14 ngut ki la hiar thma ia kawei ka shnong Amdoh ha West Jaintia Hills bad ki la pom pyn mynsaw ia ki briew bad ia ki shipai jong ka Border Security Force (BSF).

Pule Ruh: Shah khang lynti ki nongleit iathoh, rahbor ki nonglute ia arngut

La ioh jing tip ba ki khar Bangladesh ki la rung ha kawei ka ing jong u Pratap Bareh bad ki la pom pyn mynsaw ia u bad ki la rong tuh ruh ia ka pisa bad ka mobile phone jong u. La iathuh ruh bad ki khar Bangladesh ki la shoh pyn mynsaw bad ki la knieh ruh ia ka suloi jong ki ar ngut ki shipai BSF hajan ka Rongtila Border Out Post (BOP).

Ia baroh ki ba mynsaw la pynkit noh sha Dawki PHC na ka bynta ban sumar.

Kumba shu pynkynmaw kane ka dei ka sien ka ba ar mynta u snem 2020 ba ki khar Bangladesh ki la rung sha u pud u sam jong ka jylla ban pom pyn mynsaw ia ki paidbah lem bad ia ki shipai BSF.