Hiar thma ki dusmon, iap lut ki dohkha ha wah Umtung

Shillong, 13 Lber:
Ka jingleh jong ki riew dusmon ka la pyniap lut ploin ia ki dohkha dohim ha wah Umtung kaba don ha Ri-Bhoi district, bad ia kane, la lap da ka seng RBPUO hynnin kaba la leit sha katei ka wah bad lap ba ki dohkha dohthli bad kiba im ha wah ki la per sha sla um namar ka jingshah ai bih.
Haba pyntip ia kane ka jingjia, u Bah R Rymbai, U publicity ka seng u la ong ba kane ka wah ka dei kaba ai jingim ia kiba bun bah ki shnong katei ka thain ban sum ban sait, ban khwai doh hynrei kane ka jingleh dusmon ka dei ka jingma bad kan long kaba dei ban leh da kaba tyngeh ia kum kine ki briew.
“Mar ia ioh jingtip ba la don ki dohkha ba la iap, ngi la leit peit ia katei ka wah ha kane ka sngi  u Blei bad la lap ba ka long kaba shisha ba baroh ki dohkha ki la iap lut haduh ba isynei ban peit”, la ong u Bah Rymbai.
U la ong ba ka seng kan leit ban ujor sha ka deputy commissioner ka Ri-bhoi halor kane ka jingjia bad ban dawa ba ka dei ban leh da kaba tyngeh ban pynshitom ia ki briew ba don kti ha kane ka kam kaba long pyrshah ia ka ain.
U la maham  ruh ba ka seng kan nym map lada lap ia kum kine ki briew bad la kyrpad ruh ia ki paidbah ban ai jingiatreilang ban peit lem ba lada lap ne iohi ia kum kine ki riew dusmon, ki dei ban ai jingtip sha ka seng bad ruh sha ka sorkar ba kan leh ia kaba donkam.