Hiar thma 6ngut ki ehrang Taliban, iap 160ngut ha skul shipai

Peshawar, 16 Nohprah:
Ka jinghiar thma kaba jubor tam, ka la jia mynta ka sngi ha Pakistan, ha kaba 160ngut ki briew, ki la shu iap ei bad ha kaba la antad, ba 132ngut kin dei ki khynnah skul rit, haba ki ehrang Taliban, kiba don na ki, kiba leit ban pyniap ialade bad ki tiar ban pynbthei, ki la leit rung ha katei ka skul, kaba la pyniaid da ki shipai ha ka nongbah Peshawar.
La iathuh ba ki don phra ngut ki ehrang, kiba kren da ka Arabic, kiba riam ialade ruh kum ki shipai, kiba la leit rung ha katei ka skul jong ki shipai, ha ha Warsak, ha ka por 10.30 mynta mynstep bad mar kumta, ki la siat naphang ia kat ki briew, kiba ki lap bad leit rung na kawei ka skul sha kawei pat ban shu siat pyniap naphang ia ki khynnah skul.
Ym tang katta, ki la set kut ruh ia kiba bun bah ki briew, ha kaba ki la pynlong ia ki, ba kin iada na ka jingshah hiar thma ha ki shipai jong ka Pakistan. Kat haduh ba thoh ia kane ka khubor, la iathuh ba ka jingiap, ka la poi sha ka 160ngut, ha kaba kiba bun na kitei ki dei ki khynnah skul bad la iathuh ba ki don sa 122ngut na kitei, kiba la mynsaw, na katei ka jingjia. Haduh ba thoh ia ka khubor, la iathuh ba 6ngut ki ehrang, ki la iap ha ka jing ia siat, ha kaba saw ngut na ki, ki la pyniap ialade, da kaba pynbthei bom, katba arngut, ki la iap, ha ka jingshah siat ha ki shipai.
Ki don 20ngut ki nonghikai, ba kynthup ia U Principal bad 34ngut ki khynnah skul, kiba dang shah bat ha ki ehrang, ong ka khuor na ophis jong u myntri rangbah ka Khyber-Pakhtunkhwa, U Pervez Khattak. Na ka liang jong ka Tehreek-e-Taliban Pakistan, ka kitkhlieh halor katei ka jingjia bad ka khubor na katei ka seng jong ki ehrang, ka kam, ba ki don 6ngut ki riew pyniap ialade, kiba la leit hiar thma ia katei ka skul, ha kaba ki ong, ba katei ka dei ka jing pynhiar kput ia ka jinghiar thma jong ki shipai, sha ki bynta jong ka North Waziristan, kaba don mar synsah bad ka Peshawar.
La iathuh ba ki don 500ngut ki khynnah skul, ha katei ka por, ba kitei ki ehrang, ki hiar thma ia katei ka skul. La iathuh ba kitei ki ehrang, ki leit rung sha katei ka skul, lyngba kawei ka lum jingtep, kaba don mar syndah bad katei hi ka skul. Katei ka skul, ka don ruh marjan bad ka Saint Mary High School, kaba la shah pynsyier mynsiem, ha ki khyndiat sngi ba ladep.