Hiar shuki u myntri, ba bitar ki nong England, ba u pynkhein kyndon covid, da kaba ialeh ieid bad kaba ieid jongu hapoh ophis

Ka khlam corona virus, ka la pynmih ia ki jingjia ba khyllah ha kine ki sngi bad kawei na kitei, ka dei kaba la jia ia U Matt Hancock, u myntri ka koit ka khiah jong ka sorkar England.

U Hancock, ula hap iehnoh, ia ka shuki myntri jong ka sorkar England, hadien, ba u shah kren bein ha ki paidbah jong katei ka Ri, na ka daw, ba u ialeh ieid bad ka nongtrei jongu, hapoh ophis.

Katei ka jingjia, ka la long ka khubor kaba heh bah, hadien ba la pynmih da ka kotkhubor na London, The Sun.

Mynta la iathuh shuh shuh, ba U Hancock, ula ialam ia katei kaba ieid jongu, kaba dei ruh ka nongtrei ha ophis jongu, sha ka jing ialang jong ki heh sorkar lane ka G7, kaba la long ha Oxford, ha ki khyndiat sngi ba ladep. La don ka jing kynnoh ba U Hancock, ula ialam ia katei kaba ieid jongu bad ula siew, ia ka bai sah jongka ha katei ka hotel, lem bad ka bai bam, na ka pisa paidbah.

U Hancock, ula hiar shuki noh hynnin ka sngi, hadien ba la sei madan ia katei ka jingjia, da ka kotkhubor The Sun, ha kaba la pyni ia ka jing iaieid jongu bad ka Gina Coladangelo.

Haduh mynta, ka jingwad ka dang iaid ban tip, la ki ia sah lang ne em ha katei ka jingleit sha Oxford, namar ba utei u myntri ba rim u sah ha ka hotel, kaba remdor bad ula siew ia ka jingleit jongu, na ka pisa paidbah.

Mar ia mih katei ka khubor, U Hancock, uba 42 snem ka rta, ula ia pyllait noh ruh bad ka tnga jongu, kaba ula ia shong 15 kynthih, ka Martha, ha kaba ula don 3ngut ki khun.

Kaba la pyn bitar jur ia ki paidbah, ka long ba ha ka 6tarik Jymmang 2021, U Hancock, ula ialam ia ka Gina, sha ka ophis jongu, kaba dei ruh ha katei ka por, ba ka jingkhang shnong, ka dang khlain bha bad ba baroh ki nong England, kim shym la ioh ban iaid ban ieng, lane ban ia kynduh ia la kiba ieid ba thoin. La shim ruh ba ka dei ha katei ka sngi, ba U Hancock, ula ia leh ieid bad ka Gina, ha ka kamra trei jongu.

Ka Gina Coladangelo, ka ia shong mynta bad U Oliver Tress, 54, uwei na ki dap million, hynrei la iathuh ba ha katei ka sngi, ba ka mih katei ka khubor, ka Gina, ka la phet bak na iing bad ym shym tip satia shaei ba ka don, hynrei la antad, ba ka leit sah sha ka jaka kaba kan buhrieh ialade na khmat kiba bun.