Hiar shuki Parliamentary Secretery, U Bah Lamboklang Mylliem

Shillong, 29 Lber:
U Bah Lamboklang Mylliem, uba dei U Parliamentary Secretery jong ka sorkar MUA, ula hiar shuki noh mynta ka sngi, ong ka khubor ba thikna.
U bah Lamboklang Mylliem, uba dei u dkhot jong ka seng North East Social Democratic Party bad uba mihkhmat na Jirang Constituency, ula phah ia ka shithi iehnoh kam jongu mynta ka sngi, sha u myntri rangbah ka Jylla. Wat la ym shym la tip satia, ia ka daw, ba ula hiar shuki, hynrei, ki lad khubor, kiba iajan bad u, ki iathuh ba ka dei namar ba ka shuki Parliamentary Secretery, kam don satia ha ka jingbatai jong ka riti synshar Ri bad kumta, katei ka dei ka kam, kaba long beain. U Bah Mylliem, u bat ia ka tnat Taxation.
Lyngba ka jinghiar shuki jong U bah Mylliem, la iathuh, ba kin dang don shuh sa shibun kiwei pat, ki ban hiar shuki lang ha ki khyndiat sngi ban sa wan, ha kaba baroh ki don 18ngut ki Parliamentary Secretery, ha kane ka sorkar jong U Mukul Sangma.
Ka jinghiar shuki jong kitei ki 18ngut, kan buh ia ka jingma kaba khraw ia kane ka sorkar Jylla. “Kan lah ban mih kano kano ka jing kylla kaba kyndit” ong uwei na ki MLA, haba iakren bad u nongthoh khubor.
Ka jingsynshar jong ka seng Congress, ka shong synjor shibun ha kine ki sngi, ha ki bynta bapher jong ka India bad la iohi, ba tang ha ki khyndiat bnai, ar tylli ki sorkar Congress, ki la hap bad kawei ka dei ha Arunachal Pradesh bad dang ha ki khyndiat sngi ha Uttarakhand.