Lai ngut ki myntri jong ka sorkar Assam, kiba dei na ka seng Asom Gana Parishad, ki la hiar shuki noh hynnin ka sngi bad katei ka dei hadien ba katei ka seng, ka la weng noh ia ka jingkyrshan ia ka sorkar BJP, namar ba ki pyntrei kam ia ka ain Citizenship Amendment Bill.
Kitei ki myntri kiba hiar shuki, ki long U Atul Bora myntri kam rep, U Keshav Mahanta myntri kam tyngkai um bad U Phanibhushan Choudhury, myntri sambam samdih ka sorkar Jylla. Kitei ki la aiti ia ki shithi iehnoh kam jongki ha U Sarbananda Sonowal, myntri rangbah ka Jylla.
Ka seng AGP, ka don 14ngut ki MLA, ha ka iing kaba don 126ngut ki dkhot bad ka jingweng noh ka AGP, kam don jingma satia ia ka sorkar jong U Sarbananda Sonowal, namar ba ka don ka jing kyrshan jong ki 74ngut ki MLA. Ka BJP, ka don 61ngut ki MLA bad ki don sa 12ngut ki MLA jong ka Bodoland People’s Front kiba kyrshan bad sa uwei u dkhot shimet. Ka Congress bad ka All Indian United Democratic Front (AIUDF) ki don 25ngut lane 13ngut ki dkhot ha katei ka iing dorbar jong ka Assam.