Hiar pynsangeh ka KSU ia ka Dhar kompeni, ba tih maw beain ha Umiam

Nongpoh, 11 Nohprah:
Wat la ka sorkar ka la khang pyrshah ia kino kino ki briew ba kin tih beain ia ki maw ne shyiap ha ki wah; hynrei kane kam shem la treikam satia bad kane ka la paw pyrthei mynha ka sngi Saitjain ha ka jinghiar jurip da ki dkhot ka Khasi Student Union, Eastern Border Area, North Khasi Hills District ia ka Wah Umiam, Ri Bhoi District, ha kaba la lap ba ka Dhar Construction Company (DCC) ka dang bteng ban tih beain ia ki maw kiba don ha katei ka wah Umiam.
Ki nongialam ka KSU, Eastern Border Area, NKHD, ia kaba la ialam khmat da u president samla Banjop Maring, ha ryngkat bad ki dkhot ka seng, hadien ba ki la lap ia kane ka jingtih maw beain da ka DCC ha katei ka wah Umiam, kaba la pyndonkam syndon da ki kor puh shilum bad dumper, kumta ki la leit ban pynsangeh syndon ia kor puh shilum ba kin tih maw bad khang ruh ia ki trok dumper ba kin kit ia ki maw kiba na katei ka Wah.
Haba ia kren bad ki Nongthoh khubor, hadien kane jingpynsangeh tih maw na katei ka wah, u Bah Banjop Maring, u la ong, ba ka seng ka sngewlyngngoh ba ka sorkar ne ka bor District kam shem la tehlakam ia kum kine ki Company kiba pynjot ia ka Mei mariang bad khamtam ka jingitynnad jong ka wah, ha kaba ki la shu leh mon katba ki mon ban tih ia ki Maw na katei ka wah Umiam.
U la ong ruh, ha ka jingshisha ia kano kano ka wah ym lah ban kam trai da mano mano ruh, hynrei kumba ka paw ha kane wah la mih ki trai jaka kiba kam trai tang na ka daw ka jingmyntoi shimet ka jong ki, kumta haba iadei bad kane kum ka seng da lei lei kam lah satia ban pdiang, ha kajuh ruh ka por ka jingdon jong kiba kum kine kiba tih maw ha katei ka wah, kaba pynlong ia ka Wah Umiam ba kan duh noh ia ka jingitynnad jong ka.
Ka seng ka pyrshah jur ia kane ka jingtih maw da ka DCC ha katei ka wah, namar ha ka jinglap da ka seng, ka jingtih maw ha kane ka Wah la pyndon kam synndon da ki bor Mashin, ha kaba kane kan ym ktah ym tang ia kane ka wah, hynrei kan ktah bad pyniap ruh wat ia ki dohkha dohpnat kiba ju im ha katei ka wah, la bynrap u samla Banjop Maring.
Namarkata, haba iadei bad kane ka jingtih maw beain da ka DCC ha katei ka wah, ka seng ka la rai ban ujor syndon sha ka bor District ka Ri Bhoi bad sha ka District Council ba ki dei ban pynshitom katkum ki kyndon jong ka ain, hynrei lada kum ki bor ba deipeit kim shimkhia ka seng kam banse ban ujor sha ki bor ba kham halor, u la bynrap.