Hiar palat ka jingdie kali, ka bym pat ju jia la 19snem tam

New Delhi: Ka jingdie kali, ka la hiar da 18.71 percent, kaba dei ka jinghiar jong ka iew, kaba la jubor tam ha ki 19snem ba ladep, ong ka kaiphod na ka Society of Indian Automobile Manufacturers (SIAM), kaba la pynmih mynta ka sngi.

Ka jingdie ia baroh ki kali, ba kynthup ia ki kali kamai, ki ar shaka, ka long 18,25,148 ha U Naitung mynta u snem, na kaba long 22,45,223 ha u juh u bnai jong u snem ba ladep.
Katei ka jinghiar palat ka iew die kali, ka la pynlong ia ki briew, ba kin duh kam kumba 15,000ngut ha kine ki lai bnai ba ladep, ong ka khubor.
Ka SIAM, ka lap ba ka jingdie ia ki kali kit briew, ha U Naitung mynta u snem, ka la hiar shaba palat, ka bym pat ju jia naduh U Nohprah 2000. Ha u bnai ba ladep, la iathuh ba ka jingdie kali, ka la hiar da 35.95 percent hapoh ka Ri.
Ha kaba iadei bad ki kali kamai, ka Maruti Suzuki India, ka pyni ba ka hiar ka jingdie jongka, da 36.71 per cent ha U Naitung ba ladep, ha ki 96,478 unit. Ka Hyundai Motor India Ltd (HMIL), ka hiar da 10.28 per cent ha ki 39,010 units, ka Mahindra & Mahindra, ka hiar da 14.74 per cent ha ki 16,830 unit ha u bnai ba ladep.
Ha ki ar shaka, ka Hero MotoCorp, ka hiar da 22.9 per cent drop, ha ki 5,11,374 units, ka rival Honda Motorcycle and Scooter India (HMSI), ki hiar da 10.53 per cent ha ki 4,55,036 unit.