Nongpoh, 29 K’lyngkot: Khyndiat sngi ha kine ki Taiew ba la leit, ba ki briew na ka shnong Shakoikuna, ki la leit ban ujor sha u Deputy Commissioner ka Ri Bhoi, da kaba dawa ruh na u ba u dei ban pynlong ia ka jingtohkit halor ka jingkynnoh ba ka la don ka jingbamsap ne ka jingbym pyntrei hok ia ka skim RIDF 2021-22 NABARD bad kaba la paw pyrthei lyngba ka jingwad RTI na uwei u samla uba dei na Ri Bhoi District, kumta haba shimkhia halor katei ka jingujor da ki riew paidbah, u DC Ri Bhoi, mynta ka sngi, u la btah ia ki Majistror ba kin leit sha katei ka jaka, na bynta ban pynlong ia ka jingtohkit, khnang ban lap ia ki jingshisha baroh.
Haba iadei bad katei ka jinghiar leit jurip ki Majistor sha katei ka shnong, na ka liang ki katto katne ngut ki riew rangbah, ki la pynpaw ia ka jingkmen, namar ba ki la iohi ba u DC, u la shimkhia shisha halor katei ka jingujor da ki paidbah ha ka miej jong u bad kiba la ong, ba kane ka jingwan jurip da ki Majistor, ba katei ka kam kynnoh bamsap ia ka skim RIDF 2021-22 NABARD, kan sa paw pyrthei.
Ha katei ka sngi, ba ki Majistor ki la leit ban jurip ia ki jaka ba la don ka jingkynnoh, ba kam don ka jingpyntreibha ia ka skim RIDF 2021-22 NABARD, ha kaba ki briew kiba dei ban ioh jingmyntoi, ki la shu duhnoh bad kaba la kynnoh jur ba ka la don kata ka jingbamsap.
Katba uwei na ki rangbah bad uba la tip kum u Bah Jermel Makri uba don ia ka kyrteng ha katei ka skim, u la pynpaw pynban ia ka jingbymhun, namar ba ki la pynlait por baroh shisngi ban ap ia ki nongwan jurip, hynrei kim shym la poi satia ha katei ka jaka jong u.
Na ka jingkren jong utei u Rangbah, u la kynnoh ruh ba lehse ka dei ka jingleh jong u rangbah shnong, ha kaba um shym la ialam ia ki nongtrei sorkar, kiba dei ban jurip sha kito ki jaka bym pat sdang ka jingpyntrei, hynrei u la ialam da sha kito ki jaka, ba la sdang ka jingpyntrei ia katei ka skim.
Phi don ban ong eiei?