Nongpoh, 12 ’lyngkot:
Wat la ka KHADC ka la shimkhia ban pynlong da ka jingjied thymmai ia U Rangbah Shnong ha shnong Umsawnongkharai, Ri Bhoi District, ka shnong kaba la mih jingkulmar tang namar ka jingiaknieh ia ka kam Rangbah Shnong; hynrei kane ka jingthmu ka KHADC ban pynlong ia katei ka election kam shem la lah ban wanrah jinghun ia baroh ki arliang mamla, namar ha kane ka sngi ki paidbah kiba don ha ka liang u Bah Joseph Lyngdoh, uba dei ruh u Acting Rangbah shnong ia kaba la thung da ka KHADC, ki la pynpaw ia ka jingpyrshah da kaba kim treh ban iasnohktilang ha kane ka Fresh Election ka KHADC.
Haba pynlong ia kane ka elekshon, la sakhi ruh da jingdon ryngkat ki briew ia kaba la phah da ka KHADC ba kynthup ia ka Kong D. Thangkhiew lem, nangta u Sirdar ka Elaka Nongpoh u Bah Wanphrang Syiem, u Bah Moses Syngkli, Lyngdoh ka Raid Nongkharai, ki nongkitkam ka Raid Nongkharai lem bad kiwei de ki Rangbah Shnong na ki shnong ba marjan bad katei ka shnong.
Ha kane ka sngi, wat na ka liang ka bor pyniaid Distrik kim shem la khein sting, ha kaba la iohi ia ki majistor bad ki heh Pulit, ha ryngkat bad da ki phew ngut ki pulit ban pahara khnang ba kan nym don kano kano ka jingjia kaba sngewsih.
Haba ki nongthohkhubor, ki la iohi ba ka kynhun u Bah Joseph Lyngdoh, ki la pyrshah ia kane ka election jied rangbah shnong ka KHADC, kumta ha ka jingwad la ioh ka jingpynshai na kitei ki nongpyrshah, ha kaba ka daw ba kongsan hi ka dei namar ka jingbymhun ia u Bah Angelus Sun.
Ki la ong ruh ba kim sngew myntoi ban iashimbynta ha kane ka jingjied Rangbah Shnong, namar kaei kaba la leh da u Bah Angelus Sun ka long ba um burom ei ei ia ka hukum kaba la phah da ka KHADC bad Sirdar.
Ha ka jingshisha ka KHADC haduh lai sien ka la phah ia u Bah Angelus Sun ba u dei ban aiti noh ia ki kot ki sla bad u shabi ka Iing durbar sha u Acting rangbah shnong, hynrei na ka liang u Bah Angelus Sun um shem la leh ia ka hukum kaba la phah da ka KHADC.
“Kawei pat kaba ngi kum ki paidbah ngi pyrshah ia kane ka Election, ka dei namar ka jingbymlah u Bah Angelus Sun ban pynshai paidbah halor ka jingpyntreikam ia ki skim sorkar kiba wan hapoh shnong, namar katkum ka RTI la lap ba hapoh ka jinglong Rangbah Shnong u Bah Angelus Sun, haduh T. 2, 54, 92,741 klur ka pisa kaba la ioh jingiarap na ka sorkar, hynrei kat katei ka pisa tang khyndiat eh ki jingtrei kiba la paw hapoh ka shnong” ki la ong.
“Kumta, haba iadei bad kane ka election kaba la long mynta ka sngi, ngi ruh ngin sa leit sha ka KHADC ban pynshai ia baroh ki jingshisha bad ka daw kaba kongsan kaba pynlong ia ki ban kim banse ban pyrshah ia kane ka Election” ki la ong shuh shuh.
Haba ki nongthohkhubor ki la pyrshang ban kylli na ki briew ka KHADC, ha kaba na ka liang jong ki la pynshai ba ia baroh kaba mih na kane ka jingjied Rangbah Shnong bad kynthup ia ka jingniew vote, kin sa phah kaiphod sha ka KHADC ba kan leh ia kaba donkam. Uba don ha ka lympung jingialeh dei tang U bah Angelus Sun bad ia katei ka elekshon, kaba la pynlong ha iing dorbar, la pyniaid beit da ki briew jong ka KHADC.
Phi don ban ong eiei?