Hiar ka NESAC, CPGSAS bad RBFU ban leit pynshai sha ki Nongrep ha Nongmawlong

Nongpoh: Ha ka sngi kaba ka jylla ka rakhe ia ka Meghalaya Farmers Day ne ka sngi kyrpang ki Nongrep, ki heh na ka North Eastern Space Application Center (NESAC), ka College of Post Graduate Studies in Agricultural Sciences (CPGSAS) ha ryngkat bad ka Ri Bhoi Farmers Union (RBFU), mynha ka sngi Saitjain, ki la leit ban pynlong ia kawei ka prokram kaba kyrpang ha Nongmawlong ka shnong kaba hap ha Umsning C & RD Block, na ka bynta ban leit ai jingpynshai sha ki Nongrep hapoh katei ka shnong, ba kumno kin nang ban rep katkum ka juk stad kaba mynta.

Ha katei ka sngi la iohi ba u Dr. S.P. Aggarwal, Director, NESAC, ha ryngkat kiwei de ki heh kiba kynthup ia u Prof. P. Ranjit Sharma, Director of Extension Education, CAU, Imphal, nangta ki nongkitkam ka RBFU, kiba kynthup ia u Bah Duruth Majaw, President, u Bah Brightstarfield Khongwir, General Secretary ka RBFU, u Bah Ecoles Wahlang, Rangbah shnong Nongmawlong, ki Saiantis lem bad shibun kiwei pat.

Nalor ka jingpynshai halor ka jingpyndonkam ia ki buit thymmai halor ki kam rep kam riang, ki Saiantis kiba la leit sha katei ka shnong, ki la pynher ruh da u Drone, uba la shna kyrpang na bynta ki Nongrep bad u ban sa batai halor ka jinglong jingman ka khyndew bad uba lah ban batai ba kino ki jait jingthung kiba iahap bad ka khyndew, ha kajuh ruh ka por uba lah ruh ban batai halor ka jingdon ki jait khniang kiba pyniap ktah ia ki jingthung jingtep.

Katei ka jingleit ban pynshai sha ki nongrep ba kin nang ia ka rukom ha ka juk thymmai, ka dei kaba la tip kum ka Drone Ha ka Buit Rep Thymmai (DHaBReT), ia kaba la bei da ka Digital India Corporation, MeitY jong ka sorkar India, ha ryngkat ka jingiatreilang ka NESAC, CPGSAS, CAU(I) Umiam bad ka RBFU.
U Dr. S.P. Aggarwal, ha ka jingkren u la ong ba ka sorkar ka iaiwad ia kita ki lad ki lynti kiba thymmai kiba iahap katkum ka juk, khnang ban kyntiew shuh shuh ia ka kam rep ha ki shnong nongkyndong bad khamtam ban pyndonkam da ka jingstad Saian ba mynta, khnang ba ki nongrep ha ki shnong nongkyndong ba kin nangkiew katba nangmih ki sngi ki por.