Hiar ki heh UDP sha Mawsynram ban pynkhreh elekshon 2018

Shillong, 29 Jylliew:
Mynta ka sngi ki nongialam rangbah ka UDP ki la hiar sha Maw synram ban nang pyn khlaiñ ia katei ka Circle kum ka jingpynkhreh na bynta ka elekshon 2018. La pynlong ia ka jing ialang ha Khlieh shnong Communitty Hall, Maw synram bad ha katei ka jingialang la don ki nongialam na ki Unit bad ki Zone bapher bapher jong ka Mawsynram konstitwensi.
U Dr.Donkupar Roy haba kren ha katei ka sngi u la ai khublei ia ki nongtrei jong ka seng UDP kiba la kyrshan radbah ia katei ka seng bad kiba dang iaineh haduh mynta ruh watla ka la ju mad ia ka jingshah rem na kawei ka elekshon sha kawei pat ha katei ka konstitwensi. U la kob ruh ba ha kane ka elekshon 2018 ka ban wan kan long kum ka jingkhih atphyllung ka duriaw bad kan don ka jingkylla kaba khraw ha kaba ka seng UDP kan wan phai biang ha ka bor synshar. U la kren ia ka jingbym ler kam kane ka sorkar mynta bad ki kam bamsap bad u la kren ruh ba ka thong jong katei ka seng ka long ban wanrah ia ka synshar khadar kaba khuid. La pyniaid ia katei ka jingialang da u District President u bah Tito W Chyne uba la kren ia ka saiñpyrthei hapoh katei ka seng kumba ka long mynta bad la shim ruh ia ka rai ba kumka dak ka jingpynkhreh ia ka elekshon 2018 kat bym pat ioh ban pynlong ia ka elekshon jied nongkitkam thymmai yn thaw noh ia ka Adhoc Body jong katei ka seng ha Mawsynram tad haduh ban da pynlong ia ka elekshon ha u nailar,2016. Ha katei ka Adhoc body la jied ia u bah Titos W Chyne kum u President bad u bah D,Nongsiej kum u Secretary bad la jied ruh ia ki Convenor na ki khyndai tylli ki Zonal Unit jong ka Mawsynram Konstitwensi.
Ki heh jong ka UDP kiba donlang ha katei ka jingialang ki kynthup ia u President Rangbah katei ka seng u Dr.Donkupar Roy, u bah Allantry F Dkhar Vice President, ka kong Pretty Kharpyngrope President jong ka Women’s Wing, bah Teiñwell Dkhar u District Secretary bad kiwei pat ki nongialam katei ka seng. Ki nongialam katei ka seng kiba la ai jingkren ki la ong ba kane ka dei ka jingsdang jong ka seng UDP ban pynkhreh na ka bynta ka elekshon 2018.