Hiar ki heh pulit bad Majistor ban pyniasuk ia ka Borato- Maitdein

Jowai, 28 Iaiong:
Ki heh pulit ka West Jaintia Hills, kyn thup ia u Superintendent of Police, Additional SP bad ruh u Majistor ki la hiar biang mynta ka sngi sha Borato bad Maitdein ban pyniasuk ia ki ar shnong kiba don hapdeng ka jingiakyn-ad ha kaba ki jingdon jingem ka shnong Maitdein ki la shah pyn julor khamtam ha kaba iadei bad ki jingri jingdup bad ki jingthung jingtep hynnin ka sngi.
Kitei ki heh jong ka District kiba la hiar mynta ka sngi ki la pynlong ia ka jingialang paidbah ha Borato bad Maitdein ha kaba na ka liang u Additional SP ka West Jaintia Hills, u ma Chemphang Syrti, u la kyntu ia ki paidbah nongshong shnong jong kitei ki ar  shnong ba kin kiar na ka jinghuri hura, ka jingiaum snam paradoh para snam, hynrei lada don kano kano ka jingbym hun lane ka jingia khajia jaka puta, la ai jingmut ba kin ujor sha ka bor jong ka ain khnang ba ka bor jong ka ain kan ioh ban bishar bniah bad ban ai ia ka rai halor ka hok ka kynti katkum ka ain.
“Phim lah ban shim ia ka ain ha ki kti jong phi, ka dong ka iing bishar badon burom, leit tied ia ka jingkhang jong ka ba phin ioh ia ka jingbishar kaba hok, wat ia thaw khajia, wat ia umsnam, khamtam haba phi ialong shi kur shijait shi doh shisnam”, la kyntu u ma Syrti ia ki paidbah haba pynlong ia ki ar tylli ki jingialang ha Borato bad Maitdein. Utei u heh pulit u la kyntu ruh ia ki ba kim dei ban thaw ia kano kano ka jingiahuri hura, ka jingpynkylmar kaba lah ban poi sha ka jingia-um-snam hynrei ki dei ban iaid katkum ka ain namar ka don ka ain ban iada ia ka hok jong uwei pa uwei u nongshong shnong.
Ha kajuh ka por na ka liang u Rangbah shnong ka shnong Maitdein u la ai khublei kyrpang ia ki heh pulit bad ia u DC bad ia ki majistor kiba la shimkhia ia kane ka jingjia ha katei ka shnong ha kaba ym shym la don kano kano ka jingmynsaw napdeng ki paid nongshong shnong wat lada ki don ki jingpynjot ia ki mar ki mata khamtam ki jingthung jingtep.
“Nga kum u Rangbah Shnong nga la shah byrngem bad shah maham, ki paidbah ki la khang ia nga ban sah ha shnong, nga hap ban phet rieh. Kumjuh ruh u Dolloi ka Elaka Shilliang Myntang uba la ai ka jingmynjur (Recommendation) ban register ia katei ka jaka hapoh ka Forest Department ka JHADC u la shah maham”, la ong u ma Darphi Sariang, Rangbah shnong Maitdein.
Utei u Rangbah shnong u la kyntu jur ruh ia ki heh district naduh u DC, ki majistor, u SP bad Additional SP ba kin sngewbha ban iarap ban pynneh pynsah ia ka shongsuk shongsain hapdeng kitei ki ar shnong.