Hiar ki heh ka NEIPF ha Langpih, ban tip halor ka jingeh ki paitbah

Nongstoiñ: Ha ka sngi saitjaiñ jong ka taiew ba la lah ki nongïalam jong ka Northeast Indigenious People Forum (NEIPF) ka la leit sha Langpih ban wad jingtip bniah halor ka jingeh ki paitbah.
Katei ka kynhun NEIPF ka dei kaba la seng da u Anup Chetia Secretary ba rim ka seng kieng atiar na Assam ka United Liberation Front of Assom ULFA) kaba u la seng ha u bnai Jymmang 2017, hadien ba u la wan phai na ka jingshah set along haduh 16 snem ha Bangladesh
Ha katei ka jingleit sha Langpih ia u nongïalam ba hakhmat jong katei ka kynhun la synranlang da ki heh nongialam na Assam ha ryngkat ka jingiadonlang ki sengbhalang na Meghalaya kiba kynthup ia ka FKJGP, RBYF, HNYF bad kiwei kiwei.
Ha katei ka jingïakynduh lang ha katei ka sngi la pynlong ïa ka jingïalang ba lyngkot ha ki ar tylli ki jaka.Ha kaba nyngkong la pynlong ha jan ka ktem pulit jong ka Assam kaba don ha shiliang jong ka ïew Langpih bad ïa kawei pat ka jingïalang la pynlong ha ïew Langpih ha syndah u mot sah kynmaw ïa u (L) bah Hopingstoen Lyngdoh.
Na ka liang jong u Anup Chetia haba ai jingkren ha katei ka sngi u la ong ba ki kynrum kynram kiba mih ha katei ka thaiñ ki long, tang namar ka jingbym burom ïa ka Status Quo kaba la ïamynjur lang da baroh ar tylli ki sorkar kata lada ka sorkar Meghalaya ka ai ïa ki kam pynroi ha katei ka thaiñ la khanglad noh da ki briew jong ka sorkar Assam lada ka sorkar Assam ka ai ïa ki kam pynroi la pynwit noh na ki nongshong shnong jong ka Meghalaya bad dei na kine kiei kiei ba ki kynrum kynram ki jia ha katei ka thaiñ man ka por.
Nalor kata u la ong ba kaba don kam ka long ba ïa baroh ki kam pynroi ym dei ban khang lad la ki long na Meghalaya ne na Assam.Ha kajuh ka por u la ong ba kaba lyngngoh ka long ba ha katei ka thaiñ naduh Kampholduli haduh langpih ym don uwei ruh u nongshong shnong uba dei u nong Assam, lait tang ki Garo ki Khasi bad ki Nepali.
Kumta halor katei ka mat u la ong ba kin sa ïatai sani bha kumno yn leh khatduh eh u la kyntu ïa ki paitbah katei ka thaiñ ba kin ym thaw kano kano ka jingïakajia hynrei kin ïashongsuk shong saiñ bad na ka liang jong katei ka kynhun kan sa rah ïa ki jingeh sha ki ar tylli ki sorkar Meghalaya bad Assam bad ba kin sa dawa ba kitei ki sorkar ki dei ban pynkut noh ïa katei ka jingeh kaba la sahkut da ki phewsnem khang ban wan rah ïa ka shongsuk shong shngaiñ ha baroh ki paitbah nong shnong shnong.