Hiar ki EM KHADC, Hima Mylliem, Raid Marwet sha Iongkhuli

Nongpoh:Ka kynhun ki EM ha ka KHADC, ha ryngkat u Syiem, ki Myntri ka Hima Mylliem lem bad ki nongkitkam ka Raid Marwet, hynnin ka sngi, ki la hiar ban leit jurip ia ka shnong Iongkhuli, ka shnong kaba hap hapoh u pud u sam ka Raid Marwet, Hima Mylliem bad kaba la mad pat ia ka jingshah kyntur pud ha ka Assam, kata hadien ba ki bor Pulit ka Assam, ki la leit ban weng ia ki post Ilektrik kaba la leit ban thung da ka MeECL ha katei ka shnong.

Hadien ba ki la dep ban leit jurip, ki EM na KHADC, Hima Mylliem bad Raid Marwet, ki la pynlong ia ka jingialang na ka bynta ban iakren bad ki nongialam shnong lem bad ki riew paidbah na ki shnong kiba don ha katei ka thain, kata na ka bynta ban iathir iatai halor katei ka kam kyntur pud ka Assam hapoh ka shnong Iongkhuli.

Haba ki la iohsngew ia ka jingiathuh na ki briew ka Hima Mylliem bad kumjuh ruh na Raid Marwet, kitei ki EM ka KHADC, ki la sngewthuh shai ba katei ka jaka ka dang hap hapoh u pud u sam ka Meghalaya, kata lyngba ki kot ki sla kiba biang bad kiba la pynpaw ba katei ka jaka ka dang hap ha Meghalaya.

Halor ka jingtei ka jingwan kyntur pud beain ka Assam ha katei ka shnong, ki EM ka KHADC, kiba kynthup ia u Bah Jambor War, EM ka Elaka, u Bah Victor Rani, EM ka Arts & Culture, u Bah RR Kharbuki, EM Trade, na ka Hima Mylliem, la wan hiar da u Paiem Ainam Syiem, Acting Syiem ka Hima Mylliem, u Bah K. Langstieh, Myntri Langstieh ka Hima Mylliem, katba ha ka Raid Marwet, la wan ban mihkhmat da u Paiem Ken Syiem, Syiem ka Raid Marwet.
Haba ki la tip ba katei ka jingshisha, ki EM ka KHADC, ki la sngewthuh ba katei ka jaka ka dang hap hapoh u pud u sam ka Meghalaya bad kumta halor katei ka kam wan kyntur pud ka Assam, ki la shim ia ka rai ba kin sa pyntip sha ka sorkar jylla, khnang ban kan iasaid tyngeh bad ka Assam, na ka bynta ban pynbna ba katei ka jaka, ka dang hap hapoh u pud u sam ka Meghalaya.