Hiar khynra 40ngut ki BSF, ia ka ktem pulit ha Umkiang,hap pyllait noh ki pulit, ia 3ngut kiba shah kem

Shillong:Ka kynhun ki shipai Border Security Force (BSF) ha ka janmiet sngi Palei, ki la hiar khynra ïa ka Umkiang Police Patrolling Post, East Jaiñtia Hills namar ka jingshah kem ki 3 ngut ki shipai bad halor kane ka jingwan khynra ki BSF ki pulit kim banse ban hap pyllait noh ïa kitei ki 3 ngut.

Kine ki shipai BSF ki la shah kem halor ka ejahar jong kawei ka Longkmie na Kuliang, ba kynnoh ba kine ki shipai ki la jrong kti bad leh khlem akor ïa ka khun jong ka, kaba dang 15 snem ka rta nalor ka jingshoh dusmon ïa u kurim uba la mynsaw jur na ki bynta jong ka krung.
Halor kane ka ejahar, ki Pulit ki la register ïa ka case hapoh ka Khliehriat Women Police Station hapoh ka case no 16(6)2024 bad la pynngat ïa kine ki shipai hapoh ka kyndon 457/326/354/506/384/34 IPC pule lang bad ka kyndon 7/8 jong ka POCSO Act.
U Superintendent of Police ka East Jaiñtia Hills, ula pynthikna ïa kane ka jingregister case bad pyntip ba ka jingtohkit ka la ïaid shakhmat ban lah pynithuh ïa ki shipai kiba don bynta ban thombor ïa kane ka Longïing ha Kuliang.

Katkum ka khubor Pulit, la ïathuh ba haduh 35-40 ngut ki shipai BSF kila leit tur sha kane ka ktem Pulit ha Umkiang kaba hab hapoh ka jingkhmih ka Lumshnong Police Station, haduh ba ki Pulit kila hap ban pyllait noh ïa kine ki shipai.
Katkum ka ejahar jong kane ka Longkmie Kong Martina Pohsna, kine ki shipai kiba phong jaiñ ïing, ki la wan rung jubor ha Ïingsah jong ka bad thombor naphang ïa u Kurim ha ka por shiteng miet jong ka sngi Balang bad sngi Palei. La kynnoh ba kine ki shipai kila jrong kti ïa ka khun kynthei ba dang 15 snem nalor ka jingpynap suloi bad byrngem siat ïap.

Kat kum ka video ba la ring da uwei u nongshong shnong, kaba la saphriang ha ki rynsan social media, la pyni shai ba ki BSF ki la wan da ka jaiñ ïing bad la ïohi ba uwei na ki, ula rah da u sdie bad kiwei ki la rah da ki dieng bad suloi.
La ïohi ruh ba arngut ki kynthei ki la pyrshang ban knieh ïa une u sdie na une u shipai bad la ïohsngew ruh ïa ka jingkren ki kynthei ba kyrpad ïa ki BSF ban sangeh noh ïa ka jingthombor. La ïohsngew ruh ïa ka kyntien ‘Sir’ ba bun sien ha ka jingkyrpad ïa kine ki BSF.

Ha kane ka video la ïohsngew ruh ïa ki shipai BSF kiba la kren ïa ki ktien ba khor bad ktien sih ktien sang pyrshah ïa ki briew ha kane ka Ïing kynthup ïa kine ki shikmie shikhun.