Hiar ka kynhun ki MLA ban jurip Uranium sha Domiasiat

Shillong:Hadien ka jing mih khubor halor kaba jingsdang orpait jong ki jaka pynlang jaboh uranium ha Nongbah Jynrin SWKHD, bad halor jingjur jong ka ka er bih (radiation) ha katei ka thain, ka kynhun jong ka Environment Committee Meghalaya Legislative Assembly ba la lam khmat da u bah S.K Sun kum u Chairman lem bad kiwei ki MLA mynta ka sngi ka la hiar sha Wahkaji na ka bynta ban sngap ia ka sur u paidbah jong kane ka thain.

Ha katei ka jingialang kaba la khot pynlong da katei ka Committee hapoh ka shnong Wahkaji, la wan ban iashim bynta lang ruh da ki nongialam shnong jong ki 8 tylli ki shnong ha katei ka thain, ki nongialam Sengbhalang bad kumjuh ki ophisar napoh ka District.

Na ka liang jong ka Committee, ha katei ka sngi ka la ailad ia ki nongialam shnong bad kumjuh ki Sengbhalang ba kin pynsngew halor katei ka mat ha kaba kiba bun hi ki la pynpaw ha kaba la iashim bynta ban ai jingkren da ki nongialam shnong jong kitei ki 8 tylli ki shnong ha ryngka ki nongialam Sengbhalang ba kynthup ia ka Seng KSU, FKJGP, HYC bad HANM.

Ki nongkren na ki nongialam shnong kham bun hi ba ki la pynpaw ba ka la long shisha kumba la paw ha ki lad pathai khubor bad ka don shisha ka jing orpait ka dam pynlang jaboh uranium ha Nongbah Jynrin ha kaba kala buh jingma ia ki paidbah namar ka jingkiew jong ka erbih (radiation), hynrei don ruh ki nongialam shnong kiba pyrshang ban ong ba ka jingbatai ia kata ka jingkiew ne jinghiar ka erbih (radiation) kam long kaba lah ban shu pdiang, namar ym lah ban pynshisha.

Ka sur kaba mih na katei ka jingialang ka long beit ba ka sorkar ka dei ban thung da ka kynhun kaba laitluid na ka bynta ban wad bniah halor katei ka jingorpait ka jaka pynlang uranium ha Nongbah Jynrin bad ruh ban wad bniah ia ka jingkiew jong ka erbih (radiation) bad ia ka koit ka khiah jong ki paidbah nongshong shnong katei ka thain.

Haba pyrshang ban kylli ba balei ka Commiittee kam leit hi ban jurip sha Nongbah Jynrin, na ka liang jong u bah S.K Sunn u la ong ba ka Committee ka la phiah ar kynhun kata kawei ka kynhun ban iakynduh ia ki paidbah ha Wahkaji, katba kawei pat ka kynhun ka ban leit sha Nongbah Jynrin ha ryngkat ki briew ka AMD, ban jurip ia ka jinglong jingman bad ban leh ruh ia ka jingwad bniah.

Shuh shuh u la ong ruh ba hadien ba la ioh ia ka kaiphod, na ka liang jong ka Committee kan sa shong pyrkhat lang bad baroh ki dkhot bad ban bishar ia kaei kaba ka committee kadei ban leh ia kaba kan sa phah ruh sha ka sorkar.

Ha kaba iadei bad ki jingpynsngew halor ka koit ka khiah jong ki paidbah ka thain, na ka liang jong u bah Sunn, u la ong ba ka Committee ka la wan ialam ruh ia ki Doctor ba kin sngap ba ma ki ruh kin sa rah ia kaei kaba ki paidbah ki la pynsngew shapoh ka Department ka jong ki.