Hiar ka ïoh ka kot bym don shuh kiba ïoh bylla tih maw tih shyiap, ong ong U bah Titos

Shillong:U CEM ka KHADC barim uba dei ruh u nongïalam ka liang Ïatei bad u MDC ka UDP na Sohra u Bah Titosstarwell Chyne u la pynpaw ïa ka jingsngew khia kaba jur bha, lyngba ka phang ne motion kaba u la wanrah halor ka jinghiar ka ïoh ka kot bad ka jingkiew ka jingduk tasam bad ka khaïi pateng kaba la ktah ïa ka jakpoh uba tlot ha ka ïoh ka kot.

“Ka ïoh ka kot ha kine ki sngi ka la pyni ba uba riewspah u la nang riewspah bad uba duk u la nang duk. Haba phai sha ki kam khaïi ne business ha jaka la jong la leh mynta da bun ki briew ba nabar. Lah jyllei ka jingsengkam ki kompeni, ki dealer ba nabar hynrei ym don jingïarap eiei ïa samla, kumta ka Council ka dei ban don ka bynta ban pynïaid ne tehlakam ïa ka jingwan sengkam kiba nabar,” ong u Bah Chyne.

U la kdew haba ïadei bad ka kam ka Kit ka Bah ne Transport u la ong ba bun na ki bus bad taxi kiwan nabar katba kiba na shnong lajong kim ïoh kamai shuh bad bun ki ud halor kane ka bynta.
Halor ka ïoh kam ïohjam bun ki samla ki ud ba kim ïoh jingtrei ha ki kompeni. U la ong ba wat ba ka jylla ka don 80% ki nongrep, hynrei ha ka kam khaïi la bat da kiba nabar bad dei kine kiba bat ïa u shabi u lakam ka khaïi pateng ba sa hiar ka ïew die synsar mynta haduh 40% na ka 100%.

U la kyntu ba ka Council ka dei ban khot hajir ïa ka seng All Broom Stick Association bad lada kim lah ban pynhiar ïa ka dor dei ban pynduh noh ïa ka laisen khaïi jong ki.
Halor ka jingshah khang ka tih maw tih shyiap kane ruh ka la ktah bha ïa ki briew lajong kiba im kamai jakpoh bad na kadaw ba la shah khang ha la ri la jong ki la hap ruh ban shu kit tuh.
U la pynkynmaw ba ha ki por ba u dang long u CEM u la dep phah da ka jingthoh sha ka sorkar ban ailad ïa ka rukom tih maw kumba ju leh mynshwa kaba mut ban pyndonkam beit da u Lyngka, ka Belsha ym pat da ka JCB ne ki kor ba mynta khnang kiba im ha ka kam bylla shna ïing kin ym ïap ja.

Halor ka bam kum ka doh, ka pylleng, ka dohkha kaba bun hi hap wanrah na shabar duna ki briew lajong ki ban ri jingri ne buh farm.
U la ong ba nalor ka jingthaw aiñ ban ïada ïa ka jaitbynriew dei ruh ban pyrkhat ïa ka ïap ka im, ka kamai kajih ka jaitbynriew Khasi.