Hiar ka dor u Sohtrun ha Ri Bhoi, bun ki khep ba ki nongrep ki die ha ka dor kaba tad eh

Nongpoh:Ka long ka jingshisha ba ka Ri Bhoi District, ka dei kawei na ki Distrik kaba khlain eh ha ka jingpynsoh ia u Sohtrun bad kaba la wanrah jingmyntoi shikatdei eh ia kito ki nongrep, kiba la lah ban rep shibun u Sohtrun.

Pynban haba la wan kane ka khlam COVID-19, ka la wanrah jingeh shikatdei ia ki nongrep Sohtrun, namar kim ioh ia ka iew ka hat kaba biang ba kin pyniaid iew ia kitei ki Soh kaba ki la rep bad trei shitom baroh shisnem shisnem.
Haba iadei bad ka iew u Sohtrun, la ioh ban iakren bad iwei na ki Longkmie ba rep Sohtrun na ka shnong Shangbangla, bad katkum ka jingiathuh jong i, la pynpaw ba naduh ba la wan ka khlam COVID-19, ka la pynduhnong eh ia ki, namar ba jynjar ka iew ba kin pyniaid ia u Sohtrun bad lada pyniaid jubor ruh, la hap ban die ha ka dor kaba tad eh.

Katkum ka jingiathuh da itei u Longkmie, i la pynpaw ba ka iew die Sohtrun mynta la hiar shaba palat, ha kaba ki la hap ban shu die tad bad don ki khep kaba ki hap ban die tang ha ka dor ba T. 200 shi-kuri, kaba mut ba u Sohtrun u shongdor tang 10 tyngka uwei.
Haba kylli balei ki die ha kata ka dor kaba tad eh, ka jubab na itei i Longkmie ka long, ba shisien ba la don ki briew kiba thmu ban thied da ki bun bun kuri, kumta la hap ban shu die tad beit, namar lada ym die ha ka dor kaba ki pan, kan shem jingeh pat ia ki ba kumno kin leit buh ne ban die shawei, namar ba ym don ki jaka buh kiba biang bad lada ap ha kata ka dor ba biang, kaba mut ba u Sohtrun u la pyut bad la shu hap ban bret.

Na ka jingkren itei u Longkmie, la sngewthuh ba kiba bun eh na ki nongthied ia u Sohtrun ba die harud surok ha Ri Bhoi, la ju wan thied da ki nongkhaii kiba dei na ka jylla Assam, namar haba ki wanthied ki da rah da ki kali bad kiba wan ban thied da ki phew phew kuri.

Haba sngap ia ka sur jingkren itei i Longkmie, la sngewthuh ba i kwah eh ban pyniaid iew ia u Sohtrun jong i ha kata ka dor kaba biang, kata da kaba hap ban ap katto katne sngi, hynrei namar bym don ki jaka buh ba biang, kaba mut ym nud ban buh slem bad lada ap ha ka dor ba biang ne ban die hadien, u Sohtrun un sa pyut bad kan sa wanrah ia ka jingduhnong kaba khraw palat.